Mirando e situacion dificil cu Aruba ta pasando aden cu pandemia di coronavirus, pueblo di Aruba a cuminsa ripara e importancia di mundo di agricultura. E necesidad pa bin cu producto local ta resaltando, mirando cu e unico pilar economico, turismo, no ta activo na e momentonan aki.

Gregory Fung a Fat, director di United Farms Aruba, a duna di conoce cu for di varios aña atras, e funcion tabata pa uni tur e cunukeronan, pa asina haya forsa, mirando cu ‘mundo di agricultor, criado di bestia, ta sumamente importante’.

Fung a Fat a bisa cu for di 2018 nan a bin dilanti cu cinco punto, cu ainda ta andando. “Por bisa cu e combersacion no ta canando cu e velocidad cu ta desea.” Nan ta keda warda, te cu ta yega un punto unda e espera ta keda demotiva hende. Esaki ta causa tambe cu no tin un backup pa agricultura. Segun Fung a Fat, awo cu tin un situacion serio tur hende kier planta, cual ta bon, pero ‘bo ta papiando di lunanan prome cu bo wak su fruto’.

United Farms Aruba ta boga pa hende compronde e importancia di agricultura pa comunidad di Aruba y pa sigui bay dilanti cu esaki. “Nos mes a wak cu turismo a cay. Importacion y producto ta bay bira caro. E situacion ta bay ta grave, pero tin luga cu por mehora sigur.”

Dos di nan punto di importancia ta tereno y awa. E ta bisa cu WEB tin nan watermap, nan mes hunto cu partners a mira esaki y el a yega na gobierno. Pa locual ta parti di tereno, nan tin di 6 pa 9 miembro cu a haci peticion cu business plan rekeri na e momento.

Fung a Fat a bisa cu minister (red: di Desaroyo Teritorial, Infrastructura y Medio Ambiente, Marisol Lopez-Tromp) ta bisa cu ROP ta na vigor. Awo, ROPV y ta compronde su structura, pero tin cos cu mester duna prioridad, pasobra tin hende cu ta planta pa varios aña caba.

Sinembargo, e idea ta pa sigui stimula, y awo mas den e situacion di pandemia. E tin solucion posibel pa haci esaki, y pa aki 3-4 luna por garantisa un produccion local. Tin solucion cu por usa pa e parti di awa, pero pa tereno ta algo cu mester pa crece, de lo contrario no tin capacidad.

“Mester tereno. Hopi hende ta planta na cas, nos mester duna un man pa keda stimula economia y duna oportunidad pa sigui crece”, Fung a Fat ta bisa. Nan kier sinta cu gobierno pa bin dilanti cu cinco punto.

E ta bisa cu cada miembro tin cu traha hunto, pasobra ta na beneficio di tur, y no warda pa pasa den un situacion asina pa nan por ta mas uni. Tambe ta comparti cu tin material y producto di cuminda pa brinda pueblo, den caso cu bin un escasez.

Fung a Fat ta bisa cu e producto cu nan tin mas di dje ta lechuga, pero tin tres compania cu ta dedica na esaki exclusivamente. Sinembargo mester bin cu diversificacion pa yuda crece den e industria cu otro productonan. “No ta tur hende ta come lechuga, pues tomati, eggplant, concomber, mester sinta hunto pa delibera con ta bay hacie.”