United Farmers Aruba a tene un anochi informativo pa agricultornan

Diahuebs ultimo 18 april a tuma luga na Biblioteca Nacional di Aruba un anochi informativo pa agricultornan denomina“Vision of the New Economic Pillar of Agriculture” organisa pa United Farmers Aruba cu presencia di Ministerio di Naturalesa, Ministerio di Economia y e compania di financiamento Qredits.

Gregory Fung di United Farmers Aruba a expresa cu esaki tabata un anochi di informacion pa esnan interesa den topico aki por scucha y conhuntamente cu nan organisacion wak ki sorto di solucion por trece dilanti, “na final di dia bo ta scucha riba e area di ministernan nan ideanan pero nos mes no sa, awo ta e momento pa nan saca afo di nan banda con nan ta wake y conhuntamente nos a habri e sala pa scucha e preocupacionnan cu por ta nos no sa.”

E punto principal di esaki ta pa haya sa kico ta e meta y kico ta e plannan pa loke ta trata e oportunidadnan agricola, e punto ta keda riba kico a wordo haci y pa cuminsa haci “awe ta un anochi cu a nos kier presenta nos punto, ministernan mes tambe ta presenta nan punto y nos ta dunando e plataforma pa yega na nos miembronan,” el a bisa.

Recientemente minister di Economia, Geoffrey Wever a biaha pa Hulanda y a bishita instituto Wageningen University and Research pa explora e posibilidad di cooperacion pa pusha e desaroyo di agricultura comercial, aplicacion di tecnologia innovativo pa produccion comercial di entre otro fruta y berdura ta esencial pa stimula agricultura comercial, cooperacion cu institutonan di conocemento ta parti esencial pa desaroyo di agricultura comercial como un pilar nobo di Aruba su economia, segun un comunicado di minister Wever na luna di maart ultimo a sigura.

Fung a duna su comentario riba esaki indicando cu “ta un oportunidad pa nos comerciante sa kico ta wordo haci y kico Hulanda tambe por yuda nos cune, pasobra inversionnan ta keda na Aruba.”

Pa nan como organisacion ta importante pa por trece e ministernan concerni aden y laga pueblo y esnan interesa presenta nan inkietud of dudanan na ministernan pa por soluciona nan problemanan.

E preocupacion di mas grandi cu nan tin na e momentonan aki ta “energia” manera Fung a sigura, “energia ta tumando hopi di nos, pasobra nos ta pagando e tarifa di mas halto di Elmar y tur tecnologia nobo tin energia den dje.”

Riba e pregunta si nan a trece e punto dilanti caba na conocemento di gobierno, Fung a indica cu varios biaha nan a informa riba esaki “pero awor mas cu nunca bo ta wak cu ta un peso mas grandi.”

Nan no por cuminsa busca otro alternativa pa energia debi cu nan tin algun cosnan pendiente y nan no mag di haci esey riba un huurgrond “dus tanten cu bo no tin e plataforma pa tur hende sa kico ta e problemanan, nos no por hacie” el a finalisa.

Minister Ursell Arends y su ekipo a presenta un maneho nobo pa sector primario cual ta involucra esnan dedica na agricultura cria di bestia y tambe na pesca, tambe a informa cu proximamente ta bay publica e maneho nobo riba e website www.publico.aw

Minister Arends a declara cu World Bank den su rapport di 2020 a destaca cu tin cinco obstaculo na Aruba cu ta preveni desaroyo di sector di sector primario manera nan kier desaroy’e y eynan por papia riba siguridad di alimentacion, tema di tereno y coriente tambe ta keda como un problema caminda ministerionan di Naturalesa como esun di Economia, Energia y Infrastructura ya caba ta combersando riba con nan ta bay cambia e maneho di con esaki ta structura y loke nan ta mira ta cu Santa Rosa ta hunga un rol hopi mas grandi pa loke ta trata otorgamento di terenonan cu ta den ROPV y ROP destina pa sector primario.

“Esey ta concretisando na e momentonan aki pa asina duna empuhe na sector primario pa nos por papia e ora ey di Food Security, den e rapport di World Bank di 2020 a bin dilanti cu na Aruba tabata cultivando menos di 1% di fruta y berdura, awor na 2023 nos a yega na 3%, e plan ta pa aki cuatro aña yega na 10% y pa 20230 nos kier pa Aruba yega na 25%, anualmente nos ta importa mey biyon florin den fruta y berdura y si nos por cuminsa cultiva esakinan den nos propio pais y mantene un porcion di mey biyon florin cu ta bay afo, nos por garantisa cu nos por alimenta nos hendenan miho, cu ni un producto lo tin kimico y pa duna nos pueblo cuminda di calidad,” minister Arends a sigura.

Tambe, ekipo di minister a splica cu den e maneho nobo lo tin e implementacion di GAP (Good Agricultural Practices) cual ta trata di un serie di guia ariba cual agricultornan lo mester basa nan practicanan pa asina yega na un certificacion.

E tipo di standarisacion aki ta enfoca por ehempel ariba uso di pesticida, proteccion ambiental y trato di cria, e implementacion di GAP lo wordo haci den fase pa asina mantene control ariba su desaroyo den e comunidad di agricultornan.

Pa loke ta trata duda y preocupacion di esnan cu tabata presente, a puntra riba GAP caminda minister Arends a señala cu nan ta trahando riba duna proteccion na productonan di “herencia cultural” manera webo, pa nan por sigui produci sin cu lo por haya problema cu otro departamento na futuro pa loke ta trata produccion.

Riba e topico di hardin di alimentacion na varios scol, un persona presente a puntra si tin suficiente tereno pa esaki y minister Arends su contesta ta cu ROP y ROPV ta indica cua ta e terenonan cu mester wordo usa pa plantacion y cria di bestia, “aworaki esey ta un di e dos problemanan mas persistente, loke ta tereno y coriente, pasobra mayoria di agricultor cu ta usa tecnologia no ta dependiendo mes hopi di awa cu nan ta depende coriente, tereno pa sector primario ta bay wordo reorganisa pa Santa Rosa y nan ta bay zorg pa terenonan duna no wordo usa pa otro cos y con pa coregi esun cu a duna caba.”

A puntra tambe riba financiamento pa proyectonan nobo of negoshinan cu a cuminsa caba na unda Nathaly Harms di Qredits a contesta esakinan indicando cu nan ta ofrece loke ta yama E fondo di Agri-Fund cu ta provee prestamo na interes reduci di solamente 2% pa sumanan entre Afl. 5.000 y Afl. 200.000.

E Agri-Fund tin un capital total di 3 miyon florin cu pa ser inverti den proyectonan agricola comercial, ademas pa apoya empresarionan actual y esnan aspirante den sector, Ministerio di Naturalesa, Ministerio di Economia conhuntamente cu nan ta ofrece “Agri-Business Academy” cu for di 2022 e programa aki ta dirigi na fortalecemento y conocemento di habilidadnan den Business Management.