Autoridadnan ta bin trahando sin stop contra e baho mundo den ultimo dianan caminda dialuna ultimo un cantidad di cocaina transporta den container a ser confisca y tres persona a keda deteni.

Mediante un comunicado pa prensa, Cuerpo di Polis di Aruba a informa ayera diamars cu dialuna ultimo e Unit Narcotica tabata bon atento un biaha mas unda nan a logra confisca basta droga y haci detencion.

Segun a menciona, e biaha aki tabata trata di droga cu a ser transporta via container.

Unit Narcotica a haci un total di 3 detencion pa e caso aki, ta trata di e homber di inicial G.J.M.I naci na Aruba, e muhe G.M.M.I naci na Aruba y e homber J.M.I. naci na Colombia.

A confisca un suma grandi di droga cu ta cocaina, Unit Narcotica ta keda traha incansablemente pa keda combati e parti di droga.

Den otro caso, departamento di Crimen Organisa a haci 5 detencion durante entrada hudicial
 Tambe, dialuna ultimo den oranan di madruga departamento di Crimen Organisa a haci un entrada hudicial na un cas na Madiki en conexion cu a intercepta un boto mas tempran door di Kustwacht.

Segun Kustwacht a informa dialuna marduga 16 di augustus, a tuma nota di un boto den direccion di Aruba. Inmediatamente a manda dos unidad di Metal Shark pa intercepta esaki y tambe a pidi asistencia di e Dash di Wardacosta.

Durante di e persecucion, e boto a bolter. Nan prioridad tabata pa saca e 5 persona for di awa y saca e bultonan presente cu ta drif den awa. E condicion di e boto no a permiti pa saca esaki for di awa, tampoco pa tow esaki.

Despues di a sigura tur e persona nan hunto cu e bulto nan, a logra di transporta nan tur y hiba nan base di Wardacosta. A inspecciona tur bulto presente y a constata cu ta trata di un cantidad grandi di narcotica. E 5 persona di nacionalidad Venezolano y e droga, a ser entrega na miembro nan di cuerpo policial. Entretanto a destrui e narcotica i investigacion lo sigui.

Pa e caso aki, departamento di Crimen Organisa atento a dal baho mundo un biaha mas. Na e cas na Madiki a logra detene otro 5 persona tambe di nacionalidad Venezolano, 4 homber y un muhe unda nan lo mester duna cuenta na husticia pa cu nan envolvimento den e caso grandi aki.

Durante e entrada hudicial diferente departamento di Cuerpo Policial a forma parti, entre otro Team di Aresto, Flex Team, K-9 Unit y polis Uniforma.