Union Sindical di Aruba ta bibito y trahando lista di puntonan di atencion

E bloke sindical ta bibito bibito. Lider di FTA, sr. Hubert Dirksz a declara na Bon Dia Aruba cu nan ta un bloke  cu a pasa den un crisis tempo cu Dialogo Social tabata tumando luga, actualmente nan ta uni y reuniendo regularmente.  E tempo aya di Dialogo Social a presenta un kiebra caminda sindicatonan no a keda contento cu loke a wordo firma. 

Pero unabes cu a wordo instala un directiva nobo den FTA, nan a mira e necesidad pa bini cu un union sindical. Sindicalista Dirksz a bisa cu na momento cu tin cantidad di asunto pa atende di interes pa e clase trahado, nan mester tin un forsa pa e sindicatonan por mustra gobierno seriedad di e asuntonan cu mester wordo atendi. P’esey nan a bin cu e formacion di e bloke aki, esta Union Sindical di Aruba (USA). Nan ta 10 sindicato di e 14 sindicatonan cu tin na Aruba, nan ta: SEPPA,  STT, UEA, IOWA, SCCA, SIMAR,  SADA, ABV, SIWA  y FTA. “Mi ta kere  cu lo yega un momento cu tur sindicato lo forma parti di e bloke aki”, el a bisa. 

Presidente di FTA  a agrega cu apesar di tur esfuerso y tur importancia di un union sindical asina, e trabou pa nan por haya un grupo solido cu ta compronde otro y cu ta bay riba un direccion na bienestar di e trahado y e comunidad, no ta bay manera e mester ta.  

Puntonan pendiente 

Sr. Dirkzs ta afirma cu e union t’ey y e grupo di 9 pa 10 sindicato ta reuniendo regularmente y nan ta trahando un lista di puntonan di atencion.  Nan ta bay pone un plan pa asina atende e puntonan di atencion aki cu e respectivo instancianan y na prome luga gobierno.

El a bisa cu e puntonan cu ta pendiente ta hopi. Un di e puntonan actual tin di haber cu e criminalidad, situacion financiero di pais Aruba, tarifa social pa recogemento di sushi, y parkeer meter. Ademas di e diferente situacion cu e sindicatonan tin particular, entre nan e situacion cu tin den e compania di utilidad, esta WEB y Elmar. Tambe tin otro situacion den e cuerpo di ambtenaar. Tambe despues cu Dialogo Social no a sigui, FTA a bin cu algun puntonan concreto entre otro, nan a cuestiona e maneho di gobierno pa loke ta e actitud di riot polis. Pa tal motibo nan a pidi pa sa e maneho di riot polis pa asina trece un transparencia pa nan comportacion.

“Asina ey nos por keda menciona hopi di e puntonan cu ta importante pa wordo atendi y cu nos ta reuniendo pa asina ey bin dilanti cerca Gobierno na prome luga ,  y tambe combersando cu e dunado di trabou si nos por yega na puntonan clave y comun”, el a bisa.  E ta kere cu di e forma aki nan lo por busca solucion pa e problema di nos pais.