(NLTimes) – Parlamento Europeo a aproba un quota nobo pa hende muhe den posicion halto riba diamars cu ta un poco mas ambicioso cu e quota existente na Hulanda.
Desde aña 2026, 40 porciento di e companianan Europeo su huntanan di supervision mester consisti di hende muhe. Si esaki fracasa, ambos e hunta di supervision y e hunta ehecutivo mester consisti di por lo menos un tercer parti di hende muhe. Si companianan no cumpli cu e quota, nan lo enfrenta boet of cu lo blokia nombracion di hende homber.
E quota Hulandes, cual a drenta den efecto comienso di e aña aki, ta declara cu un tercer parti di companianan grandi su hunta di supervision mester ta hende muhe. E intencion ta cu e hende muhenan den e hunta di supervision, pa medio di nan rol den nombra miembronan den hunta nobo, lo sigura tambe cu mas hende muhe drenta e hunta di directornan.
Segun NU.nl, e aña aki 38 porciento di tur director di compania na Hulanda ta hende muhe, cual ta un aumento di 33 porciento compara cu aña pasa, sinembargo varios compania te ainda no a cumpli cu e quota aki.
Lara Wolters, un miembro di PvdA di e Parlamento Europeo, ta contento cu e quota finalmente a yega. Segun su persona, paisnan unda cu e quotanan ya caba a ser aplica manera Hulanda y Belgica a demostra cu nan ta funciona. Mientras paisnan cu no tin un quota manera Poland y Luxembourg ttin tiki progreso den incorpora hende muhe den posicionnan di liderazgo den añanan recien.
Ursula von der Leyen, president di Comision Europeo, tambe ta satisfecho cu esaki. “Suficiente hende muhe ta cualifica pa trabaonan den posicion halto. Cu e ley aki, nos ta sigura cu hende muhe tambe por yega na e posicionnan aki.”
