(AP) – Reguladornan di Union Europeo (UE) a acusa compania di rednan social Meta Platforms riba dialuna di kibra e bloke su reglanan digital nobo pa medio di obliga usuarionan di Facebook y Instagram scoge entre mira aviso of paga pa no mira esaki.
Meta a cuminsa duna e usuarionan Europeo e opcion di november di paga pa version sin aviso di Facebook y Instagram como manera di cumpli cu e continente su regla estricto pa privacidad di data.
Usuarionan por paga por lo menos 10 euro pa luna pa evita cu nan lo mester mira avisonan basa riba nan data personal. E gigante Mericano a lansa e opcion despues cu UE corte top a declara cu Meta mester ricibi consentimento prome cu mustra e avisonan na usuarionan, den un decision cu a menasa su model di negoshi cual ta di mustra e usuario avisonan basa riba nan actividad digital y nan interesnan online.
E Comision Europeo, UE su brasa ehecutivo, a bisa cu resultadonan preliminar di su investigacion ta demostra cu Meta su modelo “pay or consent” ta den violacion di e bloke di 27 nacion su Digital Markets Act.
Meta su model no ta permiti e usuarionan eherce nan derecho na “libremente duna consentimento” na uso di nan data personal for di su varios servicio combina pa nan mira avisonan online personalisa, e comision a bisa. E model tampoco ta duna e usuarionan e opcion di un servicio cu ta menos personalisa pero toch ta ekivalente na su rednan social, el a bisa.
“Subscripcion pa no mira aviso ta den direccion di corte mas halto na Europa y ta cumpli cu DMA,” Meta a bisa den un declaracion. “Nos ta anticipa mas dialogo constructivo cu e Comision Europeo pa trece e investigacion aki na un ciere.”
