Prome Minister Boris Johnson a tene su prome reunion cu Presidente di Comision di Union Europeo, Jean- Claude Juncker pa busca un solucion poco probabel pa un acuerdo di Brexit. Johnson ta bisa cu Reino Uni lo sali fe UE riba 31 di october ‘sin of cu acuerdo’.
Johnson ta insisti cu e por bin cu acuerdo di divorcio prome cu fecha limite pa e salida di e pais. E acuerdo traha pa Theresa May, parlamento Britanico a rechasa 3 biaha. Johnson a bisa cu e ta kere ‘apasionadamente’ cu e por logra un acuerdo, pero UE ta sigui warda pa un propuesta firme di e pais.
Minister Frances pa Europa a bisa cu paisnan di UE ta cla pa discuti propuesta nobo di Reino Uni, pero si nan proteha e acuerdo di paz di Nort Irlanda y e mercado comun di e bloc.
Papiando di un reunion di UE, Minister di Brussels, Amelia de Montchalin a bisa cu ta esencial cu cualkier amienda na e propuesta actual pa un acuerdo di divorcio mantene su mes na e tratado cu a pone fin na decada di conflicto na Nort Irlanda.
Director di BusinessEurope, Markus Beyrer, a bisa den un declaracion cu un ‘no deal’ Brexit lo ta ‘extremadamente doloroso’ pa UE y pa Reino Uni, causando daño masivo pa ciudadano y negoshi. Sinembargo Beyrer tin speransa cu Johnson lo bin cu un opcion pa un Brexit ordena.
E comision Europeo ta mantene nan mes habri pa discusion cu Reino Uni pa trece un solucion y ta urgi Johnson pa bin cu solucion viabel. Johnson ta keda ripiti cu e pais lo sali riba 31 october cu of sin acuerdo.
