Desde anuncio di minister di Transporte demisionario Ursell Arends relaciona cu cambionan pa loke ta trata e maneho di permiso di taxi, taxistanan a bin dilanti pa expresa nan malcontento pa e cambionan aki. Recientemente minister Arends a anuncia cu lo aumenta e cantidad di permiso di taxi, locual Union di Taxi ta Nos no ta di acuerdo cune y a manda un carta pa presidente di Parlamento di Aruba, Gerlien Croes, pa atende cu nan preocupacion.

Union di Taxi ta Nos (UTN), hunto cu otro organisacionnan di taxi na Aruba, a pidi un consulta urgente cu parlamento, asina e noticiero Aruba.nu a reporta recientemente. E sindicato di taxi a reacciona riba e anuncio di minister Arends pa aumenta e cantidad di permiso di taxi. E sindicato a manda un carta pa presidente di parlamento Gerlien Croes, data dialuna 20 di januari 2025, den cual e sindicato a expresa su preocupacion riba e impacto di e plannan aki riba e sector.

Segun e noticiero, presidente di UTN Rodney Besselink, a enfatisa cu e organisacion no ta contra di crecemento di e sector di transporte, pero na mesun momento a indica cu cualkier decision cu ser tuma pa expande e sector mester ta precedi pa un evaluacion detaya. Segun e UTN, ta crucial pa determina si di berdad tin mester di mas taxi riba e isla prome cu tuma tipo di decisionnan asina. E sindicato a adverti cu sin un plan bon pensa, permisonan adicional por tin consecuencianan negativo tanto pa economia como taxistanan.

Den e carta dirigi na e presidente di parlamento, UTN ta pidi atencion special na e posicion di asistente di chauffeur, cu ta depende completamente di nan trabou den e industria di taxi. E sindicato ta kere cu e chauffeurnan aki mester tin acceso directo na rijbewijs di taxi, ya cu nan ta un parti esencial di e sector.

Den e carta tambe e sindicato ta critica e hecho cu den pasado decisionnan relaciona cu permiso di taxi hopi biaha a ser tuma unilateralmente door di diferente minister di Transporte, specialmente durante añanan di eleccion.

E sindicato ta defende nan punto cu e decisionnan aki no mester ser influencia pa interesnan politico, pero mester ta basa riba un evaluacion obhetivo di e necesidadnan di e pais.

UTN ta enfatisa cu aunke en berdad Aruba ta conociendo un crecemento economico, nan a constata cu hopi taxista mester warda pa oranan largo pa por haya pasahero, hasta na luganan druk manera aeropuerto y hotelnan. E sindicato a remarca cu a pesar cu desaroyonan nobo di hotel, manera apertura di dos hotel nobo, por aumenta e demanda pa taxista, nan ta sostene nan punto di bista cu esaki no necesariamente ta hustifica un aumento inmediato den e cantidad di taxi.