Union cu otro partido no lo a nifica exito; Marisol Tromp: resultado eleccion ta mustra comosifuera Aruba no kier cambio

“No ta prome biaha cu mi ta pafo di politica. Pero con largo esaki lo dura, mi no sa.” Asina lider di MAS, Parlamentario saliente Marisol Tromp a bisa Bon Dia Aruba. Den un combersacion amplio despues di eleccion, Tromp a bisa di ta trankilo, contento di por ta pasando tempo cu su yiunan, pero ainda sin un decision fiho kico ta bay pasa despues cu instala e Parlamento nobo na Januari proximo.

Marisol Tromp y su partido MAS a perde su dos asientonan den Parlamento di Aruba, algo cu a sorprende e politico un poco, aunke cu e no tabata algo completamente inespera. E no a reacciona prome pa motibo di biahe pa Hulanda pa conmemoracion di 70 aňa di Statuut, y despues un biahe cu su yiu mas chikito, kende ta preparando pa bay studia afo. Ta momentonan cu a yuda Marisol Tromp reflexiona riba e resultadonan di eleccion pasobra. Aunke cu Tromp a anticipa cu MAS lo por a bay atras, “mi no a spera cu e resultadonan lo tabata ‘nul.’ Pero tampoco pa e otro partidonan Accion21 y Raiz. Mi no a spera cu a bari afo tur partido chikito den Parlamento.”

Y aunke cu partidonan grandi a haya formalmente nuebe y ocho asiento, realidad ta cu AVP y MEP ambos a haya seis asiento. “Mi no ta conta mes e rest zetels, pasobra eseynan ta regalonan cu nos partido chikito a duna e dosnan. Y pues e ta ‘astonishing’ cu pueblo tabata bisa henter ora di no kier e dos partidonan ey mas, cu a fada, y toch ta mira cu ambos partido ta keda cu igual sosten.”

Den su concepto y si mira e resultado di asiento riba su mes, e por mustra comosifuera Aruba no ta cambia. “A pensa cu toch comunidad kier algo nobo, y sikiera un combinacion, pero cu excepcion di FUTURO y PPA, no a vota pa un cambio.” Tromp ta haya sorprendente e hecho cu PPA a haya un asiento, mirando e status di su lider Otmar Oduber. “Esey mi ta haya frapante, unda Aruba a bira manera St. Maarten y Corsou, unda no ta preocupa si un persona ta un sospechoso cu por haya condena. Tanto cu a zundra pa Paul Croes y Benny Sevinger y toch ta vota pa un persona cu por ricibi condena.”

Motibo

Segun Marisol Tromp, motibo pakico su partido a perde asina hopi voto por ta varios. Acceso na fondo pa core campana ta duro, mientras cu yega na comunidad ta rekeri hopi placa Ademas, MAS, mescos cu hopi otro partido, tabatin dificultad pa haya candidato nobo dispuesto pa subi lista. “Mi a acerca hopi hende, pero aunke nan tabata bisa di ta gusta politica y kier duna contribucion, nan no tabata kier e parti negativo cu a bira parti di politica na Aruba. Comunidad di Aruba ta hopi chikito, e distancia cortico di tuma decision mientras cu ta topa cu otro regularmente, tur ta hunga un papel den si un persona ta dicidi pa drenta e arena of no. Pa Aruba, unda tin politica den tur cos, e ta hunga un rol grandi.”

E ironia ta cu mester di mas hende profesional den politica di Aruba, y e partidonan cu a lanta cu e meta aki ( segun nan programanan di partido, manera RAIZ, Accion21, LPR y MAS), no a haya sosten. “Por tin mil factor. Pero netamente e partidonan cu tabata critica continuo, cu tabata controla con tabata gasta placa di pueblo a cay atras.”

Promesanan

Pa Marisol Tromp, su preocupacion ta cu e partidonan cu a logra asiento, a haci promesanan cu dificilmente lo por cumpli cu nan, mirando e situacion financiero di Aruba y e compromisonan cu Hulanda. Ta promesanan cu tur eleccion ta bin dilanti. “Nos di MAS a scoge pa no haci promesa, pasobra nos tabata realistico y practico. Nos ta mara na un landspakket pero ningun di e partidonan grandi a papia di esey.”

Partidonan traha hunto

Un di e criticanan riba partidonan chikito ta cu no tabatin ningun esfuerso pa por a uni y asina sigura cu ‘votonan no ta bay perdi. Pa Tromp, uni forsa cu un otro, no tabata un opcion pasobra el a yega di haci easy, y e resultado p’e no tabata bon. “Tempo cu mi a uni na POR, entre Andin Bikker, Otmar Oduber y ami, e resultado no tabata bon pa mi. E tempo ey mi a perde hopi mas voto, hasta mas cu awor. Mi a cay e tempo ey te bou di 500 voto. Hendenan no a gusta e union entre e lidernan. Den caso di FUTURO el a traha awor, pero mi experiencia tabata otro. Si ta trata di un politico cu su historia, e risico semper ta cu otronan lo no sostene e union pa motibo di dje.

Otro factor cu sigur a haci su impacto riba e forma con comunidad a vota, ta e tema di LGBTQ plus, segun Marisol Tromp. MAS a uni na otronan manera Accion21 y RAIZ pa sostene e causa y ta parce di e paga e prijs. MEP y AVP tabata usa diferente tactica pa no duna opinion como partido y e resultado di votacion a mustra di a traha pa nan. Den otro palabra, uni na otro partido cu opinion cla tampoco ta traha, segun Tromp.

Bon Dia Aruba lo publica mas di e entrevista amplio cu drs. Marisol Tromp den un siguiente edicion.