Unificacion familiar (1).jpg

E problema mas comun di e hendenan stranhero bibando y trahando na Aruba tin di haber cu reunificacion di famia.

Hopi biaha ta e muchanan ta esunnan cu ta resulta perhudica, pasobra como inmigrante trahado na Aruba, despues di tres aña, ya nan tin derecho di trece nan famia. Pero e ta un proceso di integracion cultural nada facil, ademas di otro factornan cu ta tuma luga cu e unificacion aki.

 

Segun e hurista, Alexander Solagnier e miho forma ta pa percura cu e proceso aki por cana bon. Sinembargo tin diferencia di ley den cada pais riba e tereno aki, y loke ta legal pa ehempel na Republica Dominicana, na Aruba e no ta. Tin biaha e inmigrante inocentemente ta bin haci cosnan keriendo cu ta bon y ora cu nan ta presenta ya sea na Dimas of na Corte, nan ta pega contra e muraya, pasobra no ta cuadra cu nos cuadro legal. Mientras cu di otro banda e persona ta perde su tempo y su placa den cierto proceso cu no tabata necesario.

 

Esaki ta un di e casonan frecuente cu e hurista ta bin atende for di persona cu ta bin di afo y cu algun di nan tin basta aña estableci riba nos isla. E ta atende cu casonan relaciona cu problema pa loke ta proceso di permiso di trahadonan di afo, y belasting, caminda e ta guia nan riba e caminda cu nan por cana. El a elogia e iniciativa di directiva di fundacion Dominicano Arubanse Juan Pablo Duarte di organisa un anochi informativo riba e topico aki, ya cu tin biaha mayoria di e hendenan aki ta desconoci  nan derecho, y nan no sa con nan ta para, segun nos leynan.

 

 “Ta importante pa nan keda actualisa riba kico ta pasando den comunidad y exigencianan cu gobierno ta bin cu ne; y pa cada hende por cumpli cu nos leynan como deber ser.”  Pa medio di e charla cu el a duna recientemente den e sede di e fundacion menciona, tur hende presente por a haya sa con nan ta para legalmente y cual caminda nan por cana cu ta mas factibel y sin cu por causa mas problema.

 

Introduccion y cambio di reglanan

Hopi biaha pa motibo di introduccion sorprendente di cambio di reglanan cu sa pasa hopi biaha, e hendenan no tin informacion y nan ta keda bruha. Un mayoria di nan ta trahadonan humilde cu ta cay den gastonan innecesariamente. E ta haya cu nos tur ta traha pa nos cen; caminda cada un di nos kier traha corectamente manera gobierno kier, evitando cu nan no lo bira victima di abuso, ya cu niun hende kier benta nan placa afo.

E ta wak hopi den su oficina clientenan cu ta yega ora cu e problema ta wordo presenta caba. P’esey e meta di e anochi informativo aki tabata mas tanto pa actua di un forma mas consciente y preventivo, pa evita e tipo di problema cu normalmente e hendenan cu ta bin di afo ta confronta cu nan permanencia legal na Aruba.

 

Ora nan ta confronta problema e proceso ta bira mas largo y tin biaha den e proceso aki e hendenan ta wordo acusa di ta ilegal of cu ta haciendo cos incorecto. Pero tin biaha den e proceso mes tin fayonan cu mester wordo coregi. P’esey segun e hurista su trabou ta esun di trece e dos parti hunto pa busca un salida husto. E ta algo cu ta beneficia instancia di gobierno y e trahado cu no kier permanece legal, y cu nan kier traha debidamente pa contribui cu nos economia y contribui cu pago di belasting na caha di gobierno.