Mediante un comunicado di prensa, ayera Cuerpo Policial di Aruba “Unit Mensenhandel-Mensensmokkel (UMM) en conexion cu un investigacion andando a informa cu a tene un entrada hudicial relaciona cu mensensmokkel y mensenhandel y a detene un persona.

Ayera diahuebs den ora di mainta Unit Mensenhandel-Mensensmokkel (KPA) a haci un entrada hudicial na Caya Captain Rodgers, San Nicolas.

Nan a señala cu poco rato despues a detene un persona, un hende homber naci na Hulanda cu inicialnan M.T.E. pa mensensmokkel y mensenhandel.

E investigacion ta andando ainda y no ta descarta cu lo por tin mas detencion.

E departamento di recherche Unit Mensenhandel-Mensensmokkel ta resorta bao Korps Politie Aruba y ta consisti di recherchenan di KPA y Koninklijke Marechaussee.

Trabaonan mester continua

Tabata juni di e aña aki ora Coodinatie Centrum Mensenhandel-Mensensmokkel (CMMA) Aruba a entrega un relato anual di aña 2022 den cual ta indica tur e tarea cu a haci na 2022 pa CMMA pa combati traficacion di hende. Prome Minister Evelyn Wever-Croes a indica cu lamentablemente na Aruba ta existi riesgonan pa loke ta trata traficacion di hende y p’esey lo traha di cerca cu CMMA na purba combati esaki.

Ta sumamente importante pa keda mantene comunidad informa riba e tema aki. Pa cu esaki CMMA a organisa un campaña di conscientisacion cu yama “Habri Wowo” pa asina pone enfasis riba con importante e ta pa comunidad keda alerta riba situacionnan asina. Si na un momento of otro por nota cu tin un situacion na unda un persona a bin traha na Aruba pero e persona no tin e libertad pa tuma decisionnan riba su mes, of no tin su paspoort den su posicion, of no por sali libremente, esaki por ta un caso di mensenhandel y mensensmokkel. Den un caso asina ta importante pa notifica CMMA di e situacion pa asina nan por tuma accion.

E campaña di “Habri Wowo” ta bay continua den luna di october, cu ta luna nacional contra traficacion di hende. Esaki, mirando cu e trafico riba e website di CMMA ta subiendo, mustrando asina cu e interes pa cu e topico aki den comunidad ta halto.

Tambe, CMMA a lansa un aspecto nobo den e pakete di enseñansa riba Mensenhandel Mensensmokkel. E campaña aki, ‘No Cay Den Trampa’, ta hopi importante pa enseñansa, pa hobennan y mayornan pasobra tin preocupacionnan pa e siguridad digital di hobennan cu ta hopi online.

Hobennan ta un grupo hopi vulnerabel, no solamente na Aruba, sino na nivel mundial, pa loke ta e fenomeno di traficacion online di hende. Uso di medionan online ta creciendo mas y mas den hobennan unda nan y muchanan mas chikito pa medio di internet ta recluta via medionan social y plataformanan online di dating, eynan nan ta duna mas informacion di nan mes, cu detayenan di nan ubicacion y unda nan ta biba, entre otro. Informacionnan aki hopi biaha ta cay den mannan di hendenan cu tin mal intencion.

Tambe e tendencia di abuso sexual y otro tiponan di abuso virtual ta creciendo. Hobennan ta post potret y videonan y esakinan ta wordo bendi y rebendi rond di mundo. Ta hopi importante pa na Aruba tambe pone hopi atencion na e problema aki, na e riesgonan y peligernan di internet.