Rey Willem-Alexander tabatin un reunion cu e ombudsmannan di Curaçao, Sint Maarten y Hulanda. Cerca e representante di Aruba, cu tabata sinta banda di e Rey, principalmente berguensa tabata visible.

Na Aruba pa diescinco aña caba ta lobby intensivamente, pero politica no ta coopera. Aruba ta e unico pais den Reino unda ciudadanonan no por acudi cerca un institucion independiente, ora nan tin problema cu gobernacion.

“Esaki ta berguensa,”
 “Honestamente bisa? Mi ta haya esaki simplemente scandaloso cu Aruba no tin un ombudsman,” e ‘kwartiermaker’ di Aruba presente, Sahayra Kelly, ta bisa. “Mi no a haya nada agradable pa mester a conta e Rey e storia aki.”

Henter Reino a firma un documento tocante e institucion di un ombudsman, pero Aruba no ta realisa esaki. Tambe for di un perspectiva internacional ta experimenta esaki como ‘bergonsoso’. “Arubianonan ta expresa nan mes sí riba medionan social y riba radio, pero no tin un persona special designa pa atende nan interesnan,” Kelly ta bisa.

Tur wowo ta riba parlamento di Aruba
 Rey Willem-Alexander a scucha e kwartiermaker diaranson pasa. Tur wowo awor ta riba parlamento di Aruba, si despues di como 15 aña sí ta aproba e di tres propuesta di ley. Cu ta dura tanto ta pasobra politica na Aruba no ta continua cu e plannan o cada biaha ta bin cu propuesta di ley nobo.

“Pareu bo ta desea di ta algo manera un estado di derecho o democracia, un ombudsman mester ta aden,” e ombudsman Hulandes, Reinier van Zutphen, ta bisa. “Esey Aruba tambe ta haya. Pero pone e ultimo paso, cu ta aproba e ley tambe, esey nan no ta haci.”

Premier Evelyn Wever-Croes lo cumpli pronto cu e promesa?
Awor cu Rey Willem-Alexander tambe ta na altura di e situacion Arubano, tin speransa cu pronto algo lo bay sucede. Si no, proximo aña lo ta di dos biaha cu e ombudsmannan ta reuni na e isla ey, sin cu tin un ombudsman Arubano na mesa.

“Nos a haya un documento na cual Reino ta mara: The Venice Principles“, Van Zutphen ta bisa. “E ta un documento importante di Conseho di Europa, den cual ta para cu mester tin un ombudsman. Reino a firma esey. Bo no por ignora esaki.”

Segun Van Zutphen mester aproba e propuesta di ley prome cu 1 di januari 2020. “Presidente di Staten tabata aki y a conta: e ta bay sucede. E minister presidente di Aruba tambe a bisa esey. Mi ta tuma como un hecho cu e ombudsman ey lo t’ey dentro di un par di luna.”

Mey ora papiando cu Rey
E ombudsmannan ta bisa cu nan ta contento cu e conversacion cu e Rey, cu a dura mas o menos mey ora. “Tabata remarcable con bon e Rey tabata na altura di e situacion riba e islanan,” segun Van Zupthen. Banda di e situacion na Aruba, a papia cu Rey tambe tocante pobresa, e reconstruccion na Sint-Maarten y e crisis na Venezuela.

Bon ehemplo con sí por
E ombudsmannan ta bisa di ta satisfecho cu e ‘colaboracion estrecho’ den ultimo cinco aña. Esey por a conduci na miho investigacion y presion riba politica. “Bo ta tende hopi biaha cu e islanan y Hulanda tin problema pa traha cu otro dentro di Reino Hulandes,” Van Zutphen ta bisa. “Pero segun mi opinion, loke ta pasando den ultimo añanan, ta un bon ehemplo di con sí por.”

Nota di redaccion:

Na luna di april 2019 Bon Dia Aruba a reporta e presentacion di sra. Kelly como ‘kwartiermaker’. Nos ta mita aña mas leu ..y nada. Na varios oportunidad redaccion di Bon Dia Aruba a atende e tema aki, no solamente pa critica e tardansa pa bin cu algo asina esencial, sino pa critica tambe e erornan den set up di e ley, cu ta duna espacio na politica pa mete den trabao di un ombudsman. Sin algun cambio fundamental den e proceso di nombramento di Ombudsman lo crea atrobe un institucion sin e debido independencia. Nos lo atende e tema aki pronto den nos Editorial.