(NLTimes) – A yega na e limite pa muchanan den cuido di emergencia, segun UNICEF Hulanda. Nan ta victima di e ‘crisis andando’ den recepcion si refugiadonan na e pais.
“Esaki ta dañino na e desaroyo di e 2,073 mucha den cuido di emergencia. E muchanan vulnerable aki tin derecho na un lugar unda nan ta sinti nan mes safe y protegi. Gobierno Hulandes tin deber pa sigura esaki.”
E situacion na shelternan di emergencia ta dañino y no adecua pa mucha pa varios luna, UNICEF Hulanda ta enfatisa. Ta forsa refugiadonan pa keda den tent cu centenares di otronan den shelternan hopi druk.
E organisacion a papia cu muchanan na varios shelter di emergencia y ta mira e situacion pa mucha den shelter di emergencia ta empeorando ‘siman tras siman’. Ainda ta poniendo mas tent cu no ta adecua pa mucha, segun UNICEF.
“Nada ta cambia. Nos ta laga e muchanan aki pa nan cuenta”, segun Suzanne Laszlo, director di UNICEF Hulanda. E organisacion di ayudo kier pa duna muchanan prioridad na momento cu ta haci transferencia for di sitionan di emergencia a gran escala na lugarnan mas chikito, unda tin espacio pa ‘djis ta un mucha’. Ademas, muchanan mester ricibi suficiente cuido y ayudo psicologico y tambe mester por bay scol.
“E muchanan aki a pasa den asina hopi. Nan mester un ambiente stabiel, trankil y safe pa crece. Na luga di esaki nan ta para den un crisis di recepcion cu ta haci e daño pio ainda”, Laszlo a splica.
