Casi tres cuarta parti di tur cuminda den supermercado Hulandes enfoca riba mucha ta malo pa nan, segun organisacion caritativo pa mucha Unicef a bisa den un reporte ayera.
Unicef a evalua mas di 2mil producto pa mucha, incluyendo cereal di desayuno, postre y bebida, pa mira si nan tabatin un luga den e recomendacion di alimentacion saludabel di gobierno. Mayoria di producto a resulta di tin demasiado caloria, demasiado salo, sucu y vet satura, of tabatin demasiado escasez di fibra.
Unicef tambe a haya cu supermercadonan no a mustra reticencia na momento di promove productonan no saludabel na muchanan, particularmente a traves di uso di personahenan di caricatura popular.
Alrededor di 16% di mucha y adolescente na Hulanda tin sobrepeso, y 3% ta considera obeso.
Di e cuminda mercadea pa baby y peuter, apenas un tercer parti di companianan a cumpli cu e guia, segun e investigadonan. Apenas un di 39 cereal di desayuno a wordo considera bon pa mucha, y di e 865 spread pa pan enfoca pa mucha, 829 a ser haya no saludabel.
Ningun di e postrenan a cumpli cu e recomendacionnan dietetico.
Esaki ta prome biaha cu a investiga productonan Hulandes pa mucha na e escala aki. “E hecho cu tres cuarta parti di e productonan no ta cumpli cu e recomendacion dietetico ta shokeante”, director di Unicef Hulanda, Suzanna Laszlo a bisa AD. “Hopi mucha ta come demasiado di loke nan no mester y mucho tiki di loke nan mester. Esey por causa obesidad y diabetes.” Laszlo a bisa cu e ta spera cu e reporte lo cambia politica di gobierno y supermercado.
Sinembargo, organisacion di supermercado CBL a yama e reporte ‘demasiado negativo’. “Un mucha no por desea di nace na un miho pais cu Hulanda unda cuminda ta saludabel, varia y safe”, director di CBL, Marc Jansen a bisa NRC. “Supermercado mester bira berdureria of nos ta laga e mayornan dicidi? Unicef ta bay mucho leu bisando cu derecho di mucha ta afecta pa e benta di productonan permiti legalmente.”
CBL tambe a critica e guianan di alimentacion saludabel pa ta ‘demasiado estricto’ y a bisa cu promocion usando personahe di caricatura ya casi no ta tuma luga, a pesar cu Unicef a haya esakinan den e material promocional di 25% di producto. Supermercadonan tambe ta trahando pa reduci contenido di salo y sucu, Jansen a bisa.
E centro di conseho di alimentacion saludabel di gobierno, Voedingcentrum a bisa cu no tin motibo pa fabricantenan enfoca specificamente riba mucha pa nan productonan, y cu for di un aña di edad, muchanan por come loke adultonan ta come. E guianan di e centro ta basa riba e cinco grupo alimentario principal, conoci como e ‘schijf van vijf’, y ta conseha hende pa come hopi berdura, fruta y granonan henter. Mester reduci consumo di carni y reemplasa esaki cu bonchi, nuez, webo of tofu. Awa, koffie y te ta keda e miho fuentenan di likido, segun e recomendacionnan revisa na 2016.
