UNICEF ta mira un aumento den urgencia y disponibilidad entre actornan y tumadonan di decision pa mehora derechonan di mucha na Bonaire, St. Eustatius y Saba. E organisacion pa derechonan di mucha riba e islanan ta conclui esaki despues di a conclui un investigacion tocante e situacion di mucha na e islanan, bou peticion di e Ministerio di Interior y Relacionnan di Reino.
E situacion di muchanan riba islanan den Caribe Hulandes ta causa pa preocupacion pa algun tempo caba. Na 2013, UNICEF Hulanda a identifica ‘bottlenecks’ mayor den areanan di abuso di mucha y violencia domestico, pobresa, calidad di educacion y salud. Desde e tempo ey, gobierno Hulandes ta desaroyando varios iniciativa pa reforsa derechonan di mucha den Caribe Hulandes. Compara cu 2013, investigadonan di UNICEF a haya cu tin mehoracion den cuido di mucha. Ehempel di esaki ta e hecho cu tur scol a alcansa calidad basico, atencion pa alivio di pobresa, y inversion den calidad di cuido.
Sinembargo, e disponibilidad limita di data tocante mucha ta haci dificil pa midi resultadonan concreto di e mehoracionnan aki riba e bida real di e muchanan. Esaki ta aplica particularmente na muchanan vulnerabel, manera esunnan creciendo den famianan cu mama soltero cu entrada baho, of den un situacion di violencia domestico. “Sin data adecua tocante e situacion di e muchanan aki, nan por facilmente wordo ignora ora ta desaroyando politicanan nobo. Miho coleccion di data den Caribe Hulandes lo conduci na miho politica cu un impacto cla”, segun La-Toya Charles, lider di investigacion di UNICEF Hulanda.
A pesar di e progreso, tin cantidad di motibo pa tene e situacion di muchanan riba e tres isla firme riba agenda. Por ehempel, situacionnan di violencia domestico y abuso di mucha ta keda preocupante, y ainda tin demasiado tiki atencion pa muchanan creciendo den pobresa. Tin señal cu hende hoben tin problema pa haya diploma den educacion avansa, y demasiado mucha tin problema di obesidad for di un edad trempan.
