Fondo di Nacionnan Uni pa Infancia (Unicef) a solicita un ayudo di 500 miyon dollar pa Latino America y Caribe, un historico pedido pa un region na unda nunca a mira miyones di mucha “afecta simultaneamente”.
“Unicef ta buscando urgentemente 500 miyon dollar pa proporciona asistencia vital pa 17.4 miyon persona e proximo aña, incluyendo 11.7 mucha muhe, mucha homber y adolescentenan na Latino America y Caribe.
Ta “e mayor yamada regional di fondonan di emergencia di su historia” Unicef a agrega den un comunicado for di su sede regional na Panama.
E nota ta adverti cu Latino America y Caribe, por lo menos 23.4 miyon mucha mester di asistencia humanitario, tres biaha mas compara cu aña pasa.
E aumento aki ta debi na impacto di pandemia Covid-19, creciente fluho di migracion y aumento di desasternan natural di cambio climatico, como horcan y secura.
“Awe e region ta mas desigual y peligroso pa muchanan cu haci un aña pasa. Nunca a mira asina tanto mucha afecta simultaneamente pa emergencia multiple den tanto paisnan” Jean Gough, director regional di Unicef pa Latino America y Caribe a bisa.
Unicef a indica cu impacto economico di e pandemia a pusha miyones di famia y yiunan pa pobresa.
Ta calcula cu pa proximo aña, 4.3 miyon mucha di Venezuela cu a emigra na otro paisnan y otro 6.8 miyon mucha migrante na Mexico y Centro America lo mester asistencia humanitario, Unicef a adverti.
