E cifra di UNHCR (14.000) encuanto e presencia di refugiadonan riba nos isla anteriormente tabata interpreta como cantidad concreto di refugiado. Sinembargo e ta un calculacion di e cantidad en total di Venezolano bibando riba nos isla.

E Agencia di Nacionnan Uni pa Refugiadonan (UNHCR/ACNUR) pa prome biaha a establece contacto cu periodistanan di Aruba, pa asina duna un curso unda ta informa riba e topico cu ultimo tempo ta hayando un interes grandi bou comunidad.

A pone un enfasis riba comprende e situacion den su contexto regional y sub regional, unda segun cifranan di 2018, tin 3.9 miyon Venezolano bibando den exterior, di cual 3.1 miyon ta bibando den otro pais Latinoamericano, y 464,229 di nan ta registra como peticionario di asilo pa fin di 2018.

UNHCR su trabou ta encera proteha refugiado, personanan desplasa internamente, personanan sin nacionalidad (stateless people) y peticionario di asilo. Pero kico tur e nombernan aki ta nifica? Kico ta un peticionario di asilo? (asylum seeker, asielzoeker)? Ta importante pa defini e terminologia cu ta rondona personanan cu ta huy di nan pais, pa via di entre otro violencia y persecucion, compara cu migrantenan.

Un refugiado en si ta un persona cu a pidi y haya e status conforme regulacionnan internacional, cual ta inclui e tratado di refugiado y su protocol, na cual Aruba ta participe, pero cual tambe ta inclui e declaracion di Cartagena di Organisacion di Estadonan Americano (OEA), (Te ainda no aplicabel pa Aruba). Kier men cu un refugiado ta un peticionario di asilo cu a ricibi un contesta positivo riba su peticion.

Ademas ta existi personanan desplasa internamente (internally displaced people, IDP). Nan ta persona cu ta huyendo di e mesun situacionnan cu refugiadonan ta huy di dje, pero cu no a crusa un frontera internacional den nan huymento.

Separa migrante economico y peticionario no ta trabou simpel
No ta facil pa determina ki status y nivel di proteccion un persona cu ta huy di nan pais mester haya, conforme leynan internacional y local. Sinembargo, algo cu ta bay perdi ora di pensa riba refugiadonan, ta puntra dicon e persona a huy di su pais den prome instante. Un migrante ta emigra di su propio escogencia. Un refugiado, a cambio, ta forsa pa huy. Y no semper e situacion ta blanco cu preto. Ta completamente posibel cu un migrante a sali di su pais boluntariamente, pero den transcurso di tempo, e lo por haya miedo di bay bek si e situacion ta empeora.

Percepcion eroneo cu peticionario di asilo lo haya tur ayudo y laga comunidad pa su cuenta
Di e presentacion extenso cu prensa a haya, un parti cu a resalta ta cu a demostra cu ora UNHCR ta yuda gobiernonan local responde na e necesidadnan di refugiadonan y peticionario di asilo, no ta pone comunidad un banda den e proceso. Mas bien, e trabou cu UNHCR ta bin ta haciendo globalmente, pero tambe den region, ta refleha cu ta traha pa e interes general, ademas di esun di e refugiado. Por ehempel, den caso cu facilidadnan escolar bira preta, por busca fondo pa asina amplia e facilidadnan na scol, asina beneficiando tanto e refugiado como e local. Asina por pensa tambe riba vacuna pa peticionario di asilo, cual ta den interes general di salud publico.