Den cuadro di Dia Mundial di Seguridad y Salud na trabou, UNCHR a haci donacion di 7 AEDs (automated external defibrillator) na CMO Aruba. Algun di e AEDs lo wordo pone den edificio den cual CMO ta ubica ya cu tin 4 otro departamento di Gobierno cu gran cantidad di empleado, y e AEDs lo sigura un ambiente di seguridad na trabou pa tur personal. E otro AEDs lo ser ubica strategicamente den e CMO Mobile Medical Unit cu ta ser usa den evento y actividad nan grandi y durante emergencia.
Tambe lo inclui algun AEDs den e vehiculonan di emergencia di CMO cu ta disponibel 24 hera. Tur personal cu ta usa a ekiponan menciona a haya e training necesario. “Garantisa acceso na servicionan esencial di salud esencial pa tur residentenan di Aruba, ta di suma importancia pa UNHCR”, Sra. Irene van Rij, Head of National Office pa Aruba y Corsou, a enfatisa.” E AEDs lo ta beneficioso p’e comunidad local y tambe p’e migrantenan y refugiadonan na Aruba”.
Ya pa algun aña caba ta existi un bon relacion di colaboracion entre UNHCR y CMO Aruba. UNHCR a haci donacion di 58 unit (RHU) cu a keda usa pa reforsa e infrastructura necesario durante pandemia y nan ta sigui wordo usa durante varios otro evento y actividad tambe. Durante pandemia, UNHCR a haci donacion adicional di varios producto y equipo di proteccion esencial.
“E meta principal di CMO ta pa garantisa seguridad y bienestar de henter e comunidad, specialmente den tempo di crisis. Durante e ultimo añanan, e apoyo, cooperacion y colaboracion di parti di UNHCR tabata fundamental y masha aprecia. Nos ta contento y agradecido cu e donacion generoso aki”, Sr. Eurico (Rino) Hermans, Director di CMO a indica.
E colaboracion entre CMO y UNHCR ta resalta e importancia di ta prepara pa crisis y emergencia, pa asina garantisa un futuro mas saludable y sigur para Aruba y su residentenan.
Presente n’e entrega di donacion – UNHCR: Sra. Irene van Rij, Head National Office Aruba & Curacao y Sra.Maya Soumah, Associate Protection Officer. Di parti di CMO Sr. Rino Hermans, Director Sr. Rene Ridderstaat y Sra. Yvonne Geerman-Quant y Sra. Gina Lopez-Gnecco, Ketenmanager.
CMO ARUBA:
Crisis Management Office Aruba (CMO) ta un organisacion fundamental y multifacetica responsabel pa maneha tur situacion di crisis y emergencia y ta encarga cu coordinacion di accionnan integral riba escala nacional. CMO ta hunga un papel crucial den fortalece e preparacion y resiliencia necesario gubernamental y pa su residentenan, garantisando seguridad publico y facilitando accionnan rapido y efectivo pa mantene continuidad di operacion.
