Den cuadro cu Unesco su Media Development Programme, awe lo tuma luga e evento pa lansa e publicacion oficial di e Media Pressure Cooker Marathon. Comunidad di Aruba ta cordialmente invita pa yega Universidad di Aruba pa un evento gratis entre 7or pa 9or di anochi.
Manera nos a informa algun siman pasa, 21 periodista cual tambe di Bon Dia Aruba, media scholars y hobennan talentoso a haci un analisis riba e tereno di media na Aruba. Esaki tabata un programa di Unesco cu a cuminsa cu tres dia di charla y diferente training na Universidad di Aruba. Despues di e tres dianan intensivo aki, a dividi e participantenan entre cinco grupo pa sigui cu e trabou di acumula data pa e publicacion. E intencion pues ta pa publica un long-read multimedial tocante e tema di periodismo riba e isla y tur su aspectonan. Despues di cuater siman di produccion, awe lo publica oficialmente e esultadonan di e Pressure Cooker Marathon pa henter pueblo di Aruba. Esaki ta bay tuma luga den e Aula di Universidad di Aruba anto bo por registra riba: www.au.aw/life-long-learning.
Pa mas informacion bishita e pagina di Facebook: www.facebook.com/MDPAruba. E produccion aki ta un documento bibo. E documento a trata riba e paisahe di media na Aruba cu ta un topico hopi amplio cual a rekeri investigacion profundo. Ainda ta pendiente di cierto resultadonan di analisis cu ta andando cual lo keda agrega durante e transcurso di tempo nos dilanti, como tal, e documento aki pues ta uno inicial.
Puntonan di discusion similar cu Corsou
Periodista di Corsou Dick Drayer tabata un di esnan cu tambe a guia e programa aki. Sr. Drayer ta un corespondiente pa NOS & Omroep MAX y ta skirbi pa revista Coaching, Antilliaans Dagblad y Amigoe ñapa. Sr. Drayer tambe a forma parti di e programa algun aña pasa na Corsou. “E ta hopi refrescante pa por a conoce periodistanan di Aruba. Normalmente mi ta rondona door di periodistanan di Corsou, cu problemanan di Corsou anto bo ta pensa cu nan ta unico. Na Aruba como periodista bo ta topa cu e mesun problemanan y puntonan di discusion cu ta similar cu Corsou. Tabata leuk pa por a sinta discuti e mesun solucionnan.” A pesar cu tin algun diferencia entre Aruba y Corsou, sr. Drayer ta comenta cu e ta haya Aruba ta mas habri pa dialogo cu na Corsou.
Otro periodista cu tambe a bin for di Corsou pa duna lectura, training y guia e evento tabata Favell Maduro.”Loke a hala mi atencion aki na Aruba ta e dedicacion di tur e participantenan cu tog a bini hunto. A pesar cu nan ta traha pa un otro medio di comunicacion, tabata tin un amistad pa hunto pone algo periodistico.”
Hopi trabao
Birgit Kreykenbohm di Kreykenbohm Communication hunto cu Renske Pin di e organisacion Re-Quest a organisa e Pressure Cooker Marathon aki na Aruba. “Tabata dianan intensivo pero tambe dianan hopi productivo. No solamente pasobra periodistanan di Aruba a haya e oportunidad pa dialoga cu otro riba diferente tema relaciona cu nan profesion, pero tambe pasobra e tabata un grupo bastante diverso.”
E ta sigui bisa cu e combinacion di periodistanan cu hopi aña di experiencia cu a participa, cu algun talento hoben cu interes den e profesion, a haci e evento aki uno hopi interesante. Un di esnan cu a participa, periodista Dilma Arends, ta conta Bon Dia Aruba cu: “E tabata hopi trabao! Pero loke e programa di Unesco a presenta tabata e oportunidad pa prensa na Aruba siña con pa traha un relato investigativo, y tambe con pa traha hunto.”
Segun periodista Maduro, e ta spera cu desde e proyecto aki, e periodistanan local keda topa otro mas tanto y papia cu otro. E ta bisa: “Ora cu mi tabata na School van Journalistiek na Hulanda, esey tabata locual nos ta haci: discuti tocante periodismo y con nos por mehora nos trabou. Ami ta sinti falta di esey cu na dado momento bo ta haya un ‘push’ pa corda riba algo pa asina keda produci cada dia un tiki mas miho.”
