E ley tocante e refineria tabata exigi hopi atencion. Esey mientras otro asunto tambe mester nos atencion. Por ehemplo e situacion di delincuencia pisa, unda e serie di atraco no ta yega na un fin. Nos por a mira nos ministro encarga cu Husticia den parlamento pa defende su maneho. Straño cu e no por a conta cu apoyo di Prome Ministro, cu ta duna bon di conoce unda su preferencia ta ora ta trata di ‘kroonprins’. Nos no ta bay ripiti e lawina di critica cu e ministro di Husticia a haya di tur banda. Hopi di e critica ta hustifica y nos no mester sali na su defensa. E mes por defende su mes masha bon.
Pero tin asunto cu ta hunga un papel den background sin cu nos atencion ta cay ariba, cu tin tur cos di haci cu e maneho di su ministerio. No ta straño cu un departamento cu ta maneha permiso di estranheria ta pertenece na e ministerio cu tin su base den Infrastructura y Planificacion? No ta straño cu hasta e ministro di Husticia mes ta critica e falta di comunicacion y acceso na e informacion di DIMAS? Ta posibel splica pakico e cos aki ta asina? Si, y masha simpel tambe.
Den gobernacion anterior a surgi problema grandi entre e ministro di Husticia di Aruba y gobierno di Reino. A pone presion y a keda palabra cu e departamento aki lo a pasa pa e responsabilidad di otro ministerio, pa asina resolve e conflicto. Pero esaki nunca tabata implica cu e departamento aki pa su caracter y naturalesa no ta pertenece na Husticia. Tempo cu gobierno a cambia na 2009, no a bin un coreccion den e situacion aki, pero a laga e departamento keda bao di e ministro encarga cu Infrastructura. Esey no a keda sin consecuencia. Hopi hende ta na altura di e mescla di structura oficial y e liñanan extra oficial cu tabata core pafo y den e edificio. Si bo tabata mester un permiso den pura, bo sa unda pa acudi, pero corda di trece un saco di placa si.
E situacion interno a bira un problema grandi y aparentemente bao presion di pafo di Aruba e ‘kroonprins’ di e ‘kroonprins’ mester a sali di e departamento, pero inmediatamente a nombra un bode como director interino, cu autoridad special cu ningun otro departamento conoce. Pero ningun hende no ta ‘raise e issue’ di e pakico e departamento no ta bolbe unda e mester ta. Ta di nos conocemento cu ministro di Husticia aña pasa caba a haya sosten di su homologonan di e otro islanan y di Hulanda, pa e departamento bolbe na su cas. Awor, nos lo tende hende bisa cu esey no necesariamente ta alivia e situacion y holo di corupcion cu ta colga rond di e departamento aki. Pero no ta trata di esey, pasobra berdad corupcion por florece tur caminda.
Ta bay pa e hecho cu pasobra e ta pertenece na un otro ministerio, e coordinacion y e disponibilidad di informacion no ta cana manera mester ta.
No mester lubida cu un tempo hasta tabata asina cu Inmigracion e tempo ey parti di KPA tabatin un sistema digital integra cu e predecesor di DIMAS (DOOV). E problemanan cu e propio ministro di Husticia y e hefe di Inmigracion ta describi awor, cu nan no por tin acceso na DIMAS y mester warda te ora e persona (ilegal) presenta na aeropuerto of waf pa nan haya sa cu e tabata ilegal. Loke tampoco ta completamente berdad pasobra tur hende cu tin dos cen di conocemento di database por sa cu tur dia bo por check y traha ‘query’ di ken ta kedando atras.
