Ami como votado pa e eleccion di diabierna awo lo scoge no solamente a base di mi consenshi pero a base di un par di criteria:
1. Ami lo no vota pa un politico of un persona riba lista di cualkier partido, sea grandi of chikito, cu a wordo sentencia of tin un investigacion andando relaciona cu cualkier acto di corupcion of criminal. No ta normal pa vota pa un persona cu ta meti den corupcion of acto contra ley. Locual bo ta permiti bo ta fomenta. Si bo kier mas corupcion vota pa nan.
2. Ami lo no vota pa un persona cu por menos cu mi. Sea cu e no tin un educacion adecua of cu e tin un educacion menos cu esun di mi. No cu mi ta kere cu ami sa of por tur cos, pero si mi ta spera cu un politico cu ta bon studia y tin un bon educacion di cas lo por traha na bienestar di Aruba y lo por ta digno di mi voto.
3. Ami lo no vota pa un lider di cualkier partido, sea chikito of grandi, cu ta brasa un of mas persona riba su lista cu ta meti den corupcion of ta bao investigacion. Ora brasa corupcion ta manda un mensahe hopi malo pa e pueblo votado y ta crea un desconfiansa den nos sistema hudicial y ta bisa basicamente cu esey ta e norma cu nos tin cu sigui.
4. Ami lo vota pa un persona of un lider cu ta papia sincero, cu tin carisma, cu lo tene honor na su mes, cu tin plannan concreto y cu por wordo realisa pa Aruba. E mester mustra ken y con lo paga pa su plannan cu e ta trece dilanti. Pa bin cu idea cu ta zona bunita pa e horea di pueblo tur hende por. Por ehempel, redobla pensioen, duna tur hende servicio medico gratis, kita tur belasting etc.. Esakinan ta un gañamento formal y ami lo no cay aden.
5. Ami nunca a vota pa cos ni vota pa un persona djis paso e ta mi famia. E persona cu mi lo vota pe ta e persona cu por traha pa Aruba prome, despues pa su Partido, y na delaster luga pa su famia y su mes. Desde nos Status Aparte e secuencia aki a bay perdi y e politico ta traha simplemente pa su “friends and family”.
Traha pa Aruba mi kiermen cu por trece cambio den ley rapido pa soluciona problema cu Aruba ta sufri di dje: chauffeurnan di auto burachi tur siman, hit and run, ilegalidad den hopi negoshi, ladronicia sin gara e ladronnan, autoridad cu ta tapa pa otro, abusador di mucha cu ta cana rond liber, ministernan cu a duna tanto no-Arubiano terenonan 7 of 8 erfpacht den zona di turismo, nos sistema di Gerecht cu ta simplemente pospone casonan pa lunas largo y cu ta laga e ciudadano sufri daño material y economico.
Bo ta comparti mi pensamento di un votado consciente ?
