Ayera por a lesa e noticia lamentabel den nos matutino cu na Corsou a enkontra cuater curpa di Venezolanonan riba baranca na Koral Tabak. Segun investigacion preliminar, un lancha cu ta transporta Venezolanonan pa Corsou di forma ilegal lo a accidenta na costa y di tal manera cu tin hende a hoga, pero tambe otronan cu lo a scapa subi tera bay. Tin indicacion cu e boto tabata tin 34 persona abordo di cual 19 a hoga. Esaki segun e fuente Extra di Corsou. Den oranan trempan di mainta un cantidad grandi di polis y tambe Warda Costa a keda dirigi pa Koral Tabak despues di a ricibi informacion cu un cantidad di persona indocumenta lo mester tabata subiendo tera. Tambe personanan den e area a señala un pickup sospechoso cu tabata transporta sigur 5 persona for di e area. Na nan yegada a topa un situacion lamentabel caminda cu a topa cu cuater curpa ya sin bida benta riba tera. Tres di e curpanan tabata banda di otro y e di cuater curpa tabata na un distancia. Ta trata di dos hende homber y dos hende muhe. E estado dje curpanan tabata bastante fresco pues tin indicacion cu e curpanan no tabatin hopi ora morto of di algun dia. Pasobra e curpanan no tabata den estado di descomposicion. No masha leu for di e curpanan a topa cu un cantidad di palo cu probablemente ta procedente di e boto, hopi jug cu combustibel (gasolin) y diferente otro articulo manera paña y sapato. Un total di 19 hoben Venezolano a hoga den awanan di Corsou A cuminsa cu un buskeda na e sitio pa mira si ta haya mas hende sea na bida of morto. E helicopter di Warda Costa a bula basta rato riba e sitio y alrededor pa wak si tin sobreviviente y/of cadaver, pero no a topa nada.
Rumornan
Djis despues di e incidente lamentabel aki, diferente rumor a cuminsa circula principalmente for di Venezuela cu ta indica cu ta un cantidad di 34 persona tabatin abordo di e lancha. Ta trata aki di un grupo di hoben, tur bou di 30 aña, di cual 19 lo a fayece y sobra lo a yega tera. Vocero di Warda Costa, Roderick Gouverneur a confirma cu te den oranan laat di atardi ainda Warda Costa tabata busca y pa wak si ta logra topa cu mas curpa pero esaki no tabata e caso. Pareu cu esey autoridadnan a logra detene 2 homber na entrada di Koraal Tabak. E hombernan aki tabata completamente muha y pia abou y nan no tabata por a identifica nan mes. A detene e hombernan aki pa wak si nan lo por tin algun laso cu esunnan morto cu a haya riba baranca y e lancha. Tin indicacion cu e grupo aki a sali for di e bario San José de la Costa, Coro, Venezuela. A base di e noticia aki cu a circula, mesora via di medio social tanto na Corsou como Venezuela, famianan na Venezuela a bin haya sa kico a pasa nan sernan keri. Mesora algun famia di e defuntonan a tuma contacto cu autoridadnan aki na Corsou. E procedura cu ta sigui lo tuma contacto cu consulado Venezolano p’asina por yuda cu e parti di identificacion dje curpanan y tambe pa drenta den contacto cu algun dje famianan, cu na nan turno tin di bin Corsou pa reconoce e curpa y asina bay cu nan defunto Venezuela, despues cu autoridadnan local duna e curpa liber. E tipo di incidente aki a tuma luga aña pasa na Aruba, caminda tambe a topa curpa di cuater homber pega den baranca.
Biahe plania
Segun personanan yega na esunnan den e lancha a comenta na prensa di Coro, estado Falcon, cu e biahe aki tabata plania for di 3 luna pasa y cu e biahe lo a costa 100 dollar. En principio a bisa cu ta 45 hende lo a subi e lancha pa bin Corsou. Sinembargo 10 a dicidi na ultimo ora cu nan no ta bin mas.
