Un total di 1376 compania a exitosamente completa e registracion y checklist cu ta forma parti di e prome fase di e Aruba Health & Happiness Code (HH Code), pa cual nan a wordo otorga un seyo colorido, cual ta e seyo di pre-check.
Manera ya ta conoci, A.T.A. conhuntamente cu Departamento di Salud Publico (D.V.G.), Ministerio di Salubridad y socionan clave den e industria turistico a lansa e programa di Aruba Health & Happiness Code (HH Code) cu e meta pa sigura cu protocolnan di higiena y salud ta na un nivel cu nos bishitantenan ta spera ora di bishita un destinacion turistico manera Aruba.
Den transcurso di e siman tras di lomba, un total di 528 compania adicional den e sectornan di ‘Accommodation’, ‘Food & Beverage’, ‘Food Trucks’ y ‘Retail/Shop/Supermarkets’ a ricibi nan seyo di pre-check. E companianan aki a ricibi un e-mail confirmando cu nan a completa e prome fase di e programa exitosamente pa cual nan ta wordo otorga un seyo colorido di HH Code, cual ta e seyo di pre-check. Ta haci un apelacion na tur compania cu a registra pa verifica si a ricibi e e-mail aki, mirando cu esaki lo por a bay den ‘junk mail’.
Unabes cu a ricibi e e-mail di confirmacion aki, companianan por pasa busca nan seyo di pre-check riba diamars of diahuebs na oficina principal di A.T.A. cu ta situa pabou di Talk of the Town. Por pasa busca e seyo di pre-check durante oranan di trabou entre 8:30 AM y 12:00 PM of entre 1:00 PM y 4:30 PM. Cada compania lo wordo otorga un (1) seyo di pre-check den forma di un sticker y lo ricibi esaki den forma digital tambe. Na momento di busca e seyo di pre-check, cada compania lo mester presenta un copia di e e-mail di confirmacion cu a ricibi y lo mester firma pa asina haya e seyo di pre-check.
E 1376 companianan cu a logra pasa e prome fase di e programa HH Code awor lo por sigui pa e di dos fase di e programa, cual ta consisti di un bishita inespera di D.V.G. caminda lo inspecciona e sitio di operacion. A.T.A. kier a felicita y gradici tur compania cu ya a completa e prome fase di e programa cu e meta final pa obtene e seyo di oro. Di e forma aki e companianan aki ta contribui na eleva e nivel di higiena y salud na Aruba. Ademas, A.T.A. ta haci un apelacion na tur compania cu a ricibi e email di confirmacion pa pasa busca nan seyo di pre-check si ainda no a haci esaki, mirando cu ya caba 716 compania a busca nan seyo di pre-check. Como cu e HH Code ta un seyo mandatorio cu tur compania mester obtene, ta urgi tur compania den e cuater sectornan di ‘Accommodations’, ‘Food & Beverage’, ‘Food Trucks’ y ‘Retail/Shops/Supermarkets’ cu no a completa e registracion ainda pa haci esaki no mas tarda cu diadomingo, 14 di juni.
E tres otro sectornan cu tambe por registra pa e programa di HH Code ta inclui e sectornan di ‘Taxi’, ‘Car Rental’ y ‘Tour Operators’ cu tin te cu diabierna, 19 di juni, pa haci esaki. Pa mas informacion tocante e HH Code y con pa registra por bishita www.arubacovid19.org/ahhc of por manda un e-mail na healthcode@aruba.com.
