(AP) – Un tipo di heastroke ta e causa di morto di un fanatico Brasilero cu a atende concierto di Taylor Swift den november, segun reportahe forensico obteni pa The Associated Press riba diaranson a demostra.
Ana Clara Benevides di 23 aña a cay flauw durante Swift su di dos cantica durante e concierto dia 17 di november na Rio de Janiero, “Cruel Summer”, y a fayece oranan despues na un hospital local. E temperaturanan den e ciudad e dia aki tabata 40 grado Celsius. E fanaticonan a para den rij pa oranan prome cu e show y varios a acusa e organisadornan di no a entrega suficiente awa pa mas di 60,000 persona atendiendo e concierto na Nilton Santos Stadium. Nan a bisa cu nan no tabata permiti hiba nan mesun awa den e stadion.
E reportahe di Rio Forensic Medical Institute a bisa cu Benevides su exposicion na e calor a causa un problema cardiorespiratorio. Tambe a bisa cu e no tabatin condicionnan existente ni tampoco abuso di substancia cu por a causa su morto. E experto cu a analisa su curpa a bisa den e documento cu su “pulmon tabata comprometi seriamente y morto repentino” a causa di e calor. Un di Benevides su amistadnan ken tambe tabata na e concierto a conta media local cu nan a ricibi awa mientras nan tabata warda pa drenta e stadion. Organisadornan di T4Fa bisa den un declaracion cu e compania a “sigui e miho practicanan.” a cumpli cu “tur exigencia di autoridadnan” y a “distribui miles di boter di awa” pa e fanaticonan. T4F tambe a nenga cu no a permiti niun hende drenta cu nan propio boter di awa na e concierto.
Oficina di Ministerio Publico (OM) di Rio a habri un investigacion criminal. Polis di Rio a bisa diaranson den un declaracion cu despues cu e reportahe forensico keda analisa e “representantenan di e compania organisando e evento lo ser yama pa duna nan testimonio.”
