Mi hendenan! Con bay, Ki banda cos ta so so. Na Papiamento ora bo tin un mal dia nos ta bisa: “Mi a lanta cu pia robes.” Na Spaño, nan ta bisa: `Se levanto con los apellidos crusado.” Cual kiermen basicamente mesun cos, sino den otro contexto. E ta referi na lanta cu e pio parti di tur dos mayor. Ay si, un tiki idioma, probechando cu mayoria di nos por papia cuatro pasobra nos ta fa-bu-lo-so.

Aki nan nos ta drentando casi full un siman di tin “dushi weer”. Temperaturanan ta riba 20 grado, combina cu un biento fresco. E dianan ey cu solo tabata baha 4or di atardi a bay bon leu, y awo tin 10or di anochi y ainda ta cla pafo. Pia y man a sali, short cortico tur caminda, ciudad ta yen y ami, Hahahahahaha! Scondi den mi camber dilanti un fan. Bo ta echt kere mi ta bay hiba mi mes den e locura cu ta Hulanda ora solo sali, Nee yiu, Caribe mi ta, solo pa mi no ta nada di otro mundo. Den mi camber, cabey mara cu mi Bachata y un batido, no ni bin molestia mi. Kere mi ta bay landa den awa di canal sushi na Amsterdam, manera poco hende ki banda, dat doen we niet moppie, ik heb mooie schone en blauwe stranden thuis. Sobra dje, na Hulanda hende no sa kico ta deodorant ni te hasta ora Etos ta purba di ilustra e problema, pone deodorant na e entrada y pone special 2 for 1. Hende ta gewoon miss the point, que cosa.

Pero bon, ta asina cu mi miedo mas grandi ora mi a bin Hulanda tabata pa end up ta biba e tipico bida di studiante “porco”. E bida caminda tin sigaria y cerbes tira tur caminda.
Mi no a wordo lanta asina y mi bida Caribe semper a consisti di mantene cas limpi durante siman y diasabra lanta trempan y pone muziek y haci cas bon limpi.

Mas bien, e unico biaha cu mi a yega di tende e palabranan “manera un muhe” den un contexto positivo tabata ora di haci limpi. Cuidao mi mester a pasa un basora mal pasa. Cuidao mi mester a laga e tayonan ta hole cuminda despues di laba nan. Mi mama tabata para ban di mi y e tabata bisa mi: “Yakari, o limpias como una verdadera mujer, o no lo haces.” Ki mishi mi mester laba tayo y no haci stoof limpi tambe, ey sota ta cay. Maar ja, no ta tur hende ta conta cu e mesun criansa. Mi prome aña tabata masha bon, mi tabata biba cu hende cu mescos cu mi tabata mantene tur cos limpi, pero manera tur miedo algun dia mester wordo enfrenta, ata mi ki. E roommate nobo ta kere cu ta un hende limpi ta consisti di haci limpi ora no tin mas caminda di pone sushi. Y ami ki nan, mi no kier ta cria di niun hende pero es que me va dar la enfermedad de los puercos si mi no haci limpi.

Mi tin simannan di frustracion hinca den mi curpa pasobra mi no ta corda e ultimo biaha cu e sink di cushina no tabata yena cu tayo sushi y boter di cerbes. Mi hendenan, boso kier tende di experiencia di bida di studiante na Hulanda, Tur esaki ta parti di dje. Un dia ma lanta y mi a realisa cu mi ta practicamente mi mama y tur dia mi tin gana di pasa hende bofta pa porco cu nan ta.

Pues si boso tende di un mucha muhe na Utrecht cu a bati su roommate paso e no ta haci limpi, boso sa di ken nan ta papiando. No tin nada atractivo na un hende porco okay, kiermen si bo tin planea di bin Hulanda bin studia, resa na Dios bono mester comparti un cas cu hende cu no gusta haci limpi. Y si bo no gusta haci limpi y bo no sa con pa haci limpi, mi yiu, ta miho bo cuminsa siña. Ki nan no tin mami cu papi, bichi ta bay come bo chan chan. Ayo!