Hulanda Caribense a produci 136 miyon kWh di electricidad na 2018. Di esaki, 45.1 kWh a bin di fuentenan renobabel, cual ta igual na 33 porciento di e produccion total di electricidad na Bonaire, St. Eustatius y Saba.
Nivel di produccion riba e tres isla tabata mesun halto cu na 2017, pero un parti grandi a ser produci sosteniblemente, segun a resulta for di figuranan nobo di e generacion di produccion di electricidad den Hulanda Caribense, duna pa Bureau Central di Stadistica, CBS.
E total di produccion di electricidad na Statia tabata 14.3 miyon kWh na 2018, di cual 6.5 miyon kWh (45.5 porciento) tabata renobabel y produci pa panel solar.
E generacion di electricidad solar a cuminsa na 2016 cu instalacion di un parke solar, cual a expande considerablemente na 2017. Durante dia, e parke solar ta provee e demanda di electricidad completo, mientras cu durante anochi, generadonan di diesel ta tuma over produccion di electricidad. Den caso di condicion di clima no faborabel durante dia, por ehempel ora ta yobe, e sistema automaticamente ta pasa over na generado di diesel.
Na Saba, e total di produccion di electricidad tabata 9 miyon kWh na 2018, di cual 1.5 miyon kWh tabata genera sosteniblemente, esta 16.7 porciento di produccion total.
Saba tin dos parke solar. E prome a cuminsa opera na februari 2018 cu un capacidad di produccion di 1.14 MWp. Na februari 2019, e segundo parke solar a bira operacional cu capacidad di un MWp. Cu e segundo parke solar, Saba por casi redobla produccion di energia renobabel durante 2019.
Produccion di electricidad na Bonaire a yega na 113.1 kWh na 2018 y 37.1 miyon kWh (32.8 porciento) tabata genera sosteniblemente. Casi tur electricidad renobabel (99 porciento) a bin di turbina di biento, mientras 1% ta genera pa panel solar.
E share di energia renobabel na Bonaire tabata 42.3 porciento na 2014, pero ta parce di a stabilisa rond di 30 porciento desde e tempo ey, segun CBS.
