(El Pais) – E denuncia di e gobiernonan di Bolivia y Argentina contra e ex-presidente Mauricio Macri y algun di su colaborado pa supuestamente manda pa Bolivia suministro pa contene e protestanan di aña 2019 contra e presidente Boliviano interino Jeanine Añez a aumenta e presion politico entre ambos pais.
Husticia Argentino a habri ayera diabierna un investigacion contra e ex-mandatario pa presunto contrabando di material anti disturbio pa via di e denuncia cu e Ehecutivo a haci. Awor Macri for di oposicion ta nenga e acusacionnan y ta considera cu a forma un persecucion politico crea pa e presidente Alberto Fernandez pa desvia e atencion di e situacion sanitario y economico di e pais.
“Esaki ta prome biaha, y esaki ta duna nos berguensa como Argentinonan, cu un presidente democratico di nos pais a colabora cu un golpi di estado di un pais ruman”, e minister di Husticia Argentino Martin Soria a bisa pa prensa na Buenos Aires hunto cu e titular di e cartera di Siguridad, Sabrina Frederic.
Dialuna ultimo, Gobierno a haci un denuncia penal pa “contrabando grave” contra Macri, contra e ex-canciyer Jorge Faurie, contra e ex-minister di Siguridad Patricia Bullrich y ademas e ex-titular di Aduana, entre otronan, cu despues cu Gobierno Boliviano a revela e existencia di un carta di e hefe di Forsa Aereo -na e momentonan ey- den e cual e tabata gradici e entrega di 400.000 proyectil anti disturbio, entre otro material. Ayera diabierna, un fiscal a acusa Macri pa presunto delito, e prome paso di e causa hudicial.
Di acuerdo cu e reconstruccion realisa pa e minister di Husticia Argentino, casi 70.000 “municion anti disturbio” a sali for di Argentina den un avion militar cu destino La Paz oranan despues cu Añez a asumi su funcion. Nan a biaha den cahanan cera hunto cu un dozijn di miembronan di un escuadron Alacran, forsa di elite di Gendarmeria, polis militar di Argentina.
Tanto na Bolivia como na Argentina e prome reaccion di oposicion tabata pa pone den duda si e carta di gradicimento di e ex-comandante di Forsa Aereo publica pa e canciyer Boliviano, Rogelio Mayta tabata berdad.
Poco despues, Macri a sostene cu e denuncia tabata un cortina di shinishi di Gobierno, preocupa pa e proximo eleccionnan legislativo, den cual lo renoba e mita di e Congreso y un tercio di Senado.
