Director di WEB Luis Oduber a declara na Bon Dia Aruba cu a stipula un maneho na 2016 pa asunto di dividend di e compania aki cu ta un suma fiho otorga na gobierno a base di e ganashi genera pa e compania estatal aki.
El a prefera di abstene di bisa e suma fiho, ya cu na dado momento e suma aki ta wordo publica den nan cuenta anual.
Pa bin cu e stipula di e maneho di dividend tabatin discusion prome si tabata a base di porcentahe of suma fiho. Sinembargo pa e compania tabata importante kico ta bay ta e suma pa tene cuenta cu ne ora di traha nan plan financiero. Sr. Oduber a laga sa cu logicamente e dividend ta depende di e ganashi genera pa e compania. “Si e compania no ta produci ganashi no por paga di dividend.”
Den palabracion cu nan accionista, esta gobierno, WEB mester retene cierto di e fondonan of ganashi pa e compania por inverti den mantencion di e planta y den proyectonan necesario pa continuidad di e planta. E ta un suma alrededor di 20 miyon cu WEB mester anualmente pa inverti den nan mantencion, pasobra tin ekipo cu ta bira bieu of obsoleto caminda mester wordo renoba. Tambe otro tipo di proyectonan cu tin di haber cu eficiencia of proyectonan chikito cu ta sali di e placa presupuesta pa mantencion. Si ta proyecto mas grandi nan ta bay via financiamento via banco, asina sr. Oduber a aclaria.
