(AP) – Lubida tin cu busca un charger specifico. Pronto, Europa lo solamente mester busca un cable pa charge nan smartphone y otro dispositivonan.
Oficialnan di Union Europeo a bisa cu nan a skirbi un acuerdo provisional riba diamars unda cu ta rekeri un charger universal den e bloke di 27 nacion. E ta parti di un esfuerso mas amplio pa haci productonan bendi na Europa mas sostenibel y disminui e restonan electronico.
E reglanan nobo, cual lo drenta den efecto den aña 2024 ta nifica cu consumidornan na Europa lo mester usa un solo cable comun USB Type-C pa charge dispositivonan electronico ambos chikito y mediano.
“Consumidornan Europeo tabata frustra cu varios charger ta keda acumula den nan cas,” Alex Agius Saliba, parlamento Europeo su lider di negociacionnan a bisa na un conferencia pa prensa na Bruselas. “Awo, nan lo por haci uso di un solo charger pa tur electronico portatil, cual ta un paso importante pa aumenta conveniencia pa e consumidor.”
E dispositivo ta cubri celular, tablet, earbuds, camara digital, headphone, headset y dispositivonan pa hunga portatil, keyboard, mouse, speaker portatil y dispositivonan pa navega.
Laptop tambe ta cubri, sinembargo e fabricantenan lo haya mas tempo pa cumpli cu esaki.
E reglanan aki ta aplica solamente pa dispositivonan cu ser bendi den Europa su mercado, cual ta consisti di 30 pais. Sinembargo, di mesun manera cu e Union Europeo su regulacionnan estricto di privacidad, nan por termina siendo e standard pa henter mundo.
