Lavina Khemlani ta un studiante na universidad di Aruba. Aunke actualmente e ta riba un break di scol, e hoben ta conta Bon Dia Aruba cu e ta preparando pa un trip missionario na India y Sur Africa.
E hoben di 27 aña, den pasado a bay Hulanda studia sin embargo a bin bek Aruba sin caba pasobra e no a gusta bida na Hulanda mucho. E hoben a tuma algun curso tambe den derechonan humano. E ta bisa “E motibo principal pa cual mi tawata studia ley ta pasobra leynan na Aruba ta hopi debil. Un ehempel ta cu e gobierno a aproba e ley pa hisa nan salario den 3 minuut, pero e ley pa castiga hende cu ta abusa di mucha ainda ta wardando pa wordo discuti. E cosnan ey ta duna mi rabia, pasobra e sistema no ta funciona. Tampoco tin e cuido necesario, ni un sorto di rehabilitacion pa hendenan cu ta comete e cosnan aki” Khemlani ta splica.
Trabao missionario
Algo cu semper a keda traha riba su persona ta cu na Hulanda el a haya basta oportunidad pa haci trabounan boluntario y e no a tumanan. “E berdad ta cu mi tabata tin un poco miedo. Mi tabata wak e flyer pa trabao boluntario tur caminda, mi mente tabata un poco cera. Na luga di pasa mi zomernan ta purba di haci un diferencia mi tabata bin bek Aruba. Pero e cos ey a traha ariba mi asina tanto cu awo di berdad mi tin cu bay haci’e.”
E hoben ta comenta na Bon Dia Aruba cu su tata ta di India y desde tempo e ta chikito e tabata tuma tripnan pa India cu ne. “Semper nos a bay India, pero un biahe cu a echt keda cu mi tabata esun cu nos a tuma tempo mi tabata tin 15 aña. Mi a wak hopi pobresa riba caya. Muchanan ta pidi pa cuminda y cosnan asina. Desde e dia ey, mi di cu algun dia mi lo tuma un trip pa India y duna un tiki di mi banda. Na India e plan ta pa bay un orfanato y yuda cu e muchanan. Mientras cu na Sur Africa mi lo bay un scol pa duna les di Ingles na un scol.
E plan ta pa keda 1 luna na India y un 1 luna na Sur Africa. Mi mision ta pa por haci esaki tur aña y si algun dia tin un posibilidad cu mi por keda mi lo haci esaki tambe. Mi a ripara cu e bida di un trabao cu ta 9 pa 5 nunca lo funciona pa mi.”
Aruba
Khemlani tabata bay scol full-time y e ta traha tambe ya cu e ta rekeri di hopi placa pa por ehecuta e biahenan aki. E hoben ta conta cu ya cu el a tuma un break di scol, e ta bay acerca algun organisacion na Aruba pa haci trabao boluntario akinan tambe prome cu e bay afo.
“Mi no ta pretende di kier salba mundo henter, pero mi ta pensa cu si mi por alenta e sufrimento di un mucha mes, esey ta suficiente. Un acto di amabilidad ta haci un diferencia hopi grandi. Mi ta spera pa mi por logra mi meta. Nunca mi no a falta nada, pues ta husto pa mi duna algo bek na comunidad”
