Un señal no mucho alentador pa economia: Na october, cantidad di hende cu mester di FASE a aumenta

Ayera minister di Asunto Social, Glenbert Croes a presenta un actualisacion of bista financiero di e pagonan cu a wordo haci desde cu nan a pone na vigor e Fondo di Asistencia Social di Emergencia conoci como FASE pa yuda esunnan afecta den nan entrada debi na e pandemia di Covid.

Na luna di october e cantidad di hende cu ta haci uso di FASE y cu tin necesidad di yudansa social a cuminsa aumenta. E mandatario aki ta haya cu esaki ta un indicacion cu e situacion ta birando dificil atrobe. A pesar cu nos economia ta den reapertura y tambe ta flexibilisando reglanan pa tur hende por bay back na trabao y companianan por recupera cupo di trabao perdi, toch e situacion ta birando dificil. Te hasta e mandatario ta premira cu ainda nos ta bay tin temponan hopi dificil nos dilanti. “Kisas e tempo mas dificil ainda ta nos dilanti,” el a bisa.

Bista financiero

Den e bista financiero cu e mandatario a presenta di e pagonan haci di FASE, e ta haya cu luna di october a duna nan un señal hopi importante. Ta asina cu durante e programa di FASE 11.523 persona a haya un pago di FASE.

Den e prome luna di april, ora e programa di ayudo financiero aki a wordo introduci, e cantidad tabata hopi. Un total 10.776 persona a haya FASE y e suma paga tabata grandi: 10.253.938 florin. Pero tambe tabatin luna cu e suma a cuminsa baha keto bay. Por ehempel na september el a disminui, pero na october ta registra cu atrobe e cantidad di hende cu tin necesidad di FASE a aumenta.

Na october gobierno a paga 3.729 persona FASE na un balor di 3.539.550 florin. Actualmente, sin inclui luna di november, nan tin 35.823.298 florin total paga den asistencia social pa medio di FASE.

E trayectorio di pago di FASE ta mustra cu na inicio hopi hende a haci uso di FASE, pero despues cu a bin cu ayudo di subsidio di salario cu a tuma hopi di e trahadonan over di FASE, e gasto di FASE a baha. Pero toch a keda un gran cantidad di hende cu mester di e asistencia aki. Pues e hendenan cu ta hayando FESE ta hendenan cu no ta hayando bijstad of onderstand of otro tipo di ayudo financiero of asistencia social. Pues e cantidad di hende cu actualmente ta wordo yuda ta absolutamente grandi.

Pago di FASE pa november

Croes a informa cu pagonan di FASE na luna di november ta cuminsa awe. E pagonan aki ta wordo efectua den e periodo entre 27 di november te cu 4 di december pa trahadonan sin entrada di empresarionan chikito. Mientras cu FASE lo conoce su final te na luna di december. Mientras cu ainda ta wordo discuti e tipo y forma di ayudo cu lo reemplasa FASE pa 2021.

El a bolbe recorda pa tur hende cu tin necesidad di FASE cu pa aplicacion nobo bo tin pa luna di december entre 1 di december te cu 10 di december pa aplica. Mientras cu pa prolongacion bo tin e mesun fecha pa aplica pe. E mandatario a laga sa cu nan ta hayando hopi caso cu tin hende cu ta pensa cu despues di dia 10 nan por registra ainda, y esaki no ta posibel mas, apesar cu nan tin rason legitimo pa haya e ayudo aki.