Un sala completamente yen durante existoso evento di Hende Muhe

Dia Internacional di Hende Muhe a acapera hopi atencion y participacion durante e evento organisa door di Ministerio di Enseñansa y Famia. A conta cu presencia di mas cu 350 participante cu a bin pa scucha varios presentacion haci door di Directeur di CEDEHM Sra. Sandra Brown, Minister Michelle Hooyboer-Winklaar, y e orador principal, autor Sra. Crystal Andrus Morissette. 

Loke a resalta durante e anochi ta e determinacion di tur esnan presente pa Aruba realisa progreso pa loke ta trata aspecto di igualdad entre hende homber y hende muhe. 

“Mi ta kere cu ora nos papia di igualdad, nos no ta papia di ta “mescos” cu hende homber. Loke nos kier, y como un pais nos a duna nos compromiso door di ratifica e tratado di Nacionan Uni, ta pa nos por tin aceso na e mesun oportunidadnan cu hende homber riba un base structural. Esey ainda no ta e caso, y aki ta unda mi ta convenci door di e cantidad di hendenan, hende homber y hende muhe presente awe nochi, cu esaki ta loke pueblo mes kier mira.” Minister Hooyboer-Winklaar a finalisa.