Un refugiado pa… Cada seis ciudadano…?

Aruba proporcionalmente lo tin mas hopi refugiado cu un pais manera libanon, asina a resulta den un programa na television Hulandes. Aruba lo tin un refugiado pa cada seis habitante, mientras cu e caso grave di Libanon, cu e refugiadonan di Siria y otro pais mas, ta yega na un pa cada siete habitante. Cu practicamente 110.000 habitante – legalmente registra – esey ta duna un total di alrededor di 18.000 refugiado. Tin hasta articulo den prensa Hulandes unda ta bisa cu segun e organisacion di Nacionnan Uni pa refugiado – UNHCR – lo tin como 20.000 reugiado na Aruba. Cu esey nos lo ta lidera sikiera den esaki na nivel mundial, aunke ta dificil pa bisa cu nos mester ta orguyoso, o talvez si…, pasobra e lo ta implica cu nos ta hopi bon hende mes, cu nos ta pone nos pais disponible na refugiado di e manera aki…

E unico diferencia ta cu bo no ta mira nan. O por ta cu ta nos a custumbra caba asina hopi cu un cantidad grandi di persona cu pa nan apariencia ta identificable como Latino y cu nos no ta cana puntra cada un di nan si nan ta legal, Ilegal o refugiado. En todo caso, nan no ta drumi tur caminda riba caya o na lugarnan publico, tapando nan curpa den marduga cu cualkier cos apto cu nan por topa, manera ta e imagen cu nos ta haya di e paisnan den nos region, cu di nan mes caba tin un poblacion considerable cu den hopi caso no tin un dak riba nan cabez. Unda nan ta anto?

Nan ta biba plama riba henter e isla, den apartamento si nan por paga, o den cualkier camber di plywood traha den cualkier cura di hende. Nos no a ripara e aumento enorme den ultimo 10 – 15 aña di tur tipo di construccion, den casco urbano di Playa y San Nicolas, pero tambe den cualkier otro parti di e isla? Cuanto pobreza nan ta sufri eyden, nos no sa, pero nos ta kere e instancianan cu ta atende nan, cu alimento y otro cos. Aparentemente gobierno(nan) a opta pa laga comunidad silenciosamente absorbe e problema aki, y no a crea campamento di refugiado, cu un grupo grandi riba otro, loke lo a duna su propio problemanan tambe. Sin embargo, e politica silencioso aki no por ta aplicable pa e deber di informacion cu gobierno tin cu su propio ciudadanonan. No por simplemente bisa nos cu no ta nos asunto.Y aki segun nos opinion gobierno ta fayando grandemente den duna informacion na comunidad. Y esaki pa un motibo mas. Ta logico cu gobierno ta haya cierto fondo di exterior pa combati e gastonan cu e grupo di refugiado ta trece cu nan. Nos no sa cuanto esey ta ni si e ta yega o no. Asina mes nos ta kere cu tin bastante gasto scondi cu ta nos como ciudadano ta paga. Si esey ta asina, anto ta necesario pa gobierno responsabliza su mes pa loke ta gasta na esaki sin cu e ta visible den presupuesto. Nos ta menciona algun. Ora un refugiado bira malo e mester por haya tratamento medico. No pa AZV paga directamente pasobra nan no ta residencia aki, pero pa tratado y pa consideracion humano mester atende nan. Ken ta paga? Gobierno. Si nan tin yiu, nan tin derecho y deber pa bay scol. Ken ta paga e gastonan extra na scol pa nan? Gobierno? Si esey ta e caso, nan tin mas suerte cu e ciudadano cu mester traha pa e por paga gasto di scol pa su yiunan.

Pa tur claridad, nos no ta trece e cosnan aki dilanti pa crea envidia y rencor, simplemente nos ta desea cu tin informacion adecua di e asuntonan aki, pasobra nos tin derecho di sa. Y tambe pasobra tin varios problema den nos comunidad cu mester resolve, cu por beneficia di un maneho abierto encuanto refugiado. Por ehemplo, den sector priva tin un escasez considerable di trahador. Nos ta considera solamente importa mas hende o nos ta cuminza un maneho di incorpora nan den nos forza laboral? Pakico nos no ta tende nunca nada di banda di nos mandatarionan encarga, ya cu trabao oficial ta implica tambe cu tur e hendenan aki lo bay contribui, loke segun nos lo ta e maneho di cualkier gobierno responsable. Si esey no ta e caso, anto nos no tin pakico di keha tocante tanto hende cu ta traha den sector informal, sea como empresario, sea como empleado. Si e tarea ta pa caba mas tanto posible cu trabao informal pa haci nos fondonan social mas fuerte y beneficia caha di e propio gobierno, anto lo ta necesario pa cuminza comunica cu comunidad.

Den tur esey nos a keda cu un pregunta tambe. Esey ta: cuanto di e personanan cu ta aki, ta refugiado y cuanto simplemente ta ‘ilegal’, indocumenta? Nos tin e fuerte impresion cu ora ta papia den medionan internacional di refugiado aki, nan no ta haci e distincion ey. Aki tambe ta unda nos autoridadnan debe nos claridad. Nos en todo caso sa sigur cu mayoria di persona indocumenta, awor cu frontera a habri atrobe, no ta risca nan bida riba un boto, sino ta subi un avion, ta baha aki y no ta sali mas… Di tur eseynan gobierno tin un tesoro na informacion digital cu nan a duna na entrada. Ta nos mes tin varios aña ta haci bida di gobierno facil, pasobra nos no ta puntra. Awor si.