(AFP) – Recortenan dramatico den sosten ta poniendo miyones di bida den riesgo, segun loke e hefe pa refugiadonan di UN a adverti diahuebs, mientras e tabata prepara su empleadonan pa recorte cu lo bini como resultado di paro den sosten di Merca.
“Recortenan den financiamento pa e sector humanitario ta poniendo miyones di bida den riesgo,” Filippo Grandi a expresa den un declaracion. “E consecuencianan pa hende cu ta huy di peliger lo ta inmediato y devastador.”
Den un memo interno, manda na empleadonan global y mira pa AFP, Alto Comisario di United Nations pa refugiadonan tambe a adverti tocante e incertidumbre financiero cu UNHCR lo “inevitablemente resulta den un reduccion significante den e tamaño di nos forsa laboral. No tin duda cu e siguiente lunanan binidero lo ta sumamente dificil,” el a bisa den e memo. “Nos no tin otro opcion mas cu tuma accion decisivo cu lo laga ningun parti di nos organisacion y nos trabao sin impacto. Refugiadonan lo sinti impacto. Nos operacionnan lo sinti impacto. Varios colega lo sinti e impacto.”
E memo, cual AFP a ricibi di 2 fuente independiente y un tercer fuente a confirma, ta bisa cu UNHCR ta “enfrentando un periodo di incertidumbre financiero, primeramente (pero no unicamente) a causa di e congelacion continuo di tur sosten cu Merca ta provee – historicamente nos donador mas grandi.”
Organisacionnan mundial humanitario ta encontrando incertidumbre desde cu Donald Trump a regresa como presidente den januari, pushando un agenda anti-refugiado y anti-migrante ademas di inmediatamente congela mayoria financiamento pa sosten den exterior.
E agencia di refugiado di UN, cual tabata depende riba Merca pa cubri alrededor di 40% di su presupuesto, ya caba a bisa AFP luna pasa cu e tabatin plan di despedi “alrededor di 600 empleado” di un forsa laboral global di casi 20.000 persona.
No a keda cla con hopi mas trabao lo mester recorta, un empleado di UNHCR a bisa bao condicion di keda anonimo. “E moral di hende ta sumamente abao…tin hopi rumor; porta 30% di e empleadonan lo recorta. Porta mas ainda,” e empleado a bisa. “Desde awe, no tin informacion cla y esey tambe ta un fuente di frustracion.”
E empleado a bisa cu tin frustracion significante dentro di UNHCR tocante e hecho cu maneho a permiti asina hopi di e agencia su presupuesto ta den man di un solo donador. “E situacion aki no lo a sucede si tabatin un maneho mas balansa pa loke ta trata di unda financiamento ta bin.”
UNCHR no ta e unico organisacion den ricibi un golpi. UN su International Organization for Migration por ehempel, a bisa e siman aki cu e lo recorta 6.000 di su empleadonan.
Den su declaracion publico, Grandi a enfoca prome riba e consecuencianan fuerte cu e recortenan aki ya caba tin riba e personanan mas vulnerabel den mundo.
“Cu menos financiamento, menos empleado y menos presencia di UNHCR den paisnan cu ta acepta refugiadonan, e resultado ta simpel: lo perde bidanan,” el a adverti.
