Club Kibrahacha a celebra su di 36 aña di existencia ayera cu desvelo di su logo nobo y tambe e entrega di e prome boton ‘Eric D’Arnault’ na un boluntario hopi special di e club, esta sra. Irene Robles de Medina di apenas 95 aña.
E intencion tabata pa celebra e di 35 aniversario na 2020, y lansa e logo nobo, pero e pandemia a stroba e actividad, Jeffrey Matos, Director, a bisa Bon Dia Aruba. “Nos no kier warda mas, pa trece un aire fresco back den e organisacion, particularmente despues di e pandemia.” E aire nobo ta un reinvento pa e club cu tin como meta ofrece actividad y servicio na e grupo dinamico di personanan di 60 aña of mas, pa asina conhuntamente traha riba un bida largo y uno saludabel y contento.
E bunita di e trabao boluntario di Sra. Robles de Medina ta cu e tin 35 aña ta yuda den actividadnan na Club Kibrahacha, pues practicamente a mira e club crece bira un centro importante pa varios hende cu ta cu pensioen. “E tabata un docente di obra di man y a bin yuda cu actividad na Kibrahacha. Pero awor si el a retira y nos ta reconoc’e cu e prome pin ‘Eric D’Arnault’ cu ta co-fundador di Club Kibrahacha,” Matos a bisa Bon Dia Aruba.
Club Kibrahacha a keda funda pa ta un centro di encuentro di personanan cu a baha cu pensioen y tabata haya falta di e contactonan social. Y e actividadnan a desaroya cu tempo tambe, for di obranan di man te na actividadnan di movecion y salud. Y mas recien, Club Kibrahacha a cuminza ofrece diferente curso, incluso di computer pa su clientenan.
Bon Dia Aruba lo amplia den nos siguiente edicion riba e trabao importante cu Club Kibrahacha ta haci pa percura cu tin espacio pa un grupo di ciudadano cu kizas ya no ta traha mas, pero en todo caso, por sigui hopi activo y contento door di mantene lasonan di amistad cu otro. Tur esaki, danki na subsidio di Gobierno, di Rotary, contribucion di e miembronan mes y recaudacion di fondo, ademas di e trabao incansabel di 40 boluntario.
