Dia mundial di teatro ta presenta y celebra

Actor y actrisnan talentoso y inspira

Un grito, un hari, un lagrima, un zundra, un silencio

Un mente, alma y curason di un otro den un actor bibo transforma

Un sintimento foi sla cu ta rementa of tembla enamora

Su bos cu ta guia su actuacion den cada bayle di movecion

Un curason cu ta sclama pa su liberacion den cada expresion

Un combersacion, un dedicacion, un storia di amor, un drama of comedia

Un tentacion ,un cancion, un emocion di alegria den un Feria

Letranan cu bida cu ta sinja nos con mas pa biba y stima

Ta nos tur ta un actris, un actor

Riba e tarima di paz y amor

Den nos humilde bida awor

Cu nos mesun goso, pasion y dolor

Nos tin “awe” den nos man

Nos no sa di majan

Laat of tempran, nos tur ta prohimo ruman

Pabien na tur den e mundo espectacular di teatro

Pabien na tur coleganan den e mundo di Poesia 21 di Maart

Pa nos tur bendicion pa cu nos dia unico y special

Un brasa y un sunchi riba boso frenta

Manera nos, no tin dos igual

Corda cu “ser bo mes mas” no ta na benta

Boso por actua y bira ken y kiko cu boso kier

Den boso poema of den boso obra teatral

Y despues “bin bij” bek na realidad

Y sigui sinya pa logra boso mesun felicidad.

Teatro ta un wega, un wega popular dushi y excitante

Pa pueblo goza, mira, scucha y sinti hasta e letranan di un Poeta cantante

Den e mundo magico teatral flamante y facinante entre enemigo, amigo y amante.

Y entre tur e sernan multicultural precioso, bunita, nechi y elegante.

Dedica specialmente na mi bunita amiga di ayera,awe y semper e carismatico y talentoso

Sra. Elizabeth “Bea” Croes Quilotte, kende a destaca fantasticamente den e “Hoofdrol” como e bunita “Mama ta traha” cu e rol principal como tal den un di e Obranan teatral di tempo di FESTESECO hopi anja pasa den anjanan nobenta den Cas di Cultura dirigi pa sra.Munye Winklaar Oduber kende semper a sigui destaca den e.o. su obranan literario. Mas di esnan cu a destaca den e mundo di teatro ta e.o. Amy Lasten y Madelene Kelly. Pabien na boso nan tur pa cu boso bunita logronan.

Awendia Bea ta felismente casa cu Marlon y tin nan dushi famia, e ta un bunita super mom y Oma bendiciona cu su yuinan y dushi nietonan sabi, talentoso, tur cuidadanonan ehemplar. Y cu hopi energia y zjeito ainda pa sigui actua den obranan teatral cu por inspira y toca na su porta di su bunita curason. Una ves artista, semper artista.