Den cuadro cu e topico di cannabis su cultivacion y legalisacion, nos a acerca dokter na Departamento di Salud Publico, Wilmer Salazar pa sigui e discusion y haya su reaccion medico riba e tema.
“Mi ta kere cu mester bin un plataforma cu ta wordo forma pa dokternan; neurologo, kimico, botanico.E parti huridico tambe mester considera, participacion politico y participacion di comunidad pa por establece un sistema”, segun sr. Salazar.
Nos tin cierto tipo di medicamentonan cu ta bin di droganan adictivo, manera Morphine. “Anto e ta wordo uza por medio di vigilancia estricto cu solamente ta aplica pa cierto tipo di pashent. Asina tambe Cannabis por wordo uza pa e parti aki si el a wordo comproba cu su beneficio y efecto toxico no lo crea un situacion pio.”
E medico ta conta nos cu e parti recreacional tin ley stricto riba dje pa su uzo pero ultimamente tin un sistema na unda ta purbando/mas habri pa e parti medicinal. Cannabis como producto total tin cierto componente kimico den dje cu algun di nan tin efectonan mental y pa otro sistema, segun e medico. E parti cientifico ainda ta wordo studia segun e ta bisa nos, unda cu ainda tin evaluacionnan cu mester wordo haci mas profundo riba cierto resultadonan. “Mester evalua si tin evidencia cientifico cu pa cierto tipo di malesa, mas tanto malesanan refractario (tratamento/remedi no ta funciona), ki toxiconan e por causa”, e ta bisa.
Decision politico
Esaki ta un situacion unda ta encera un decision politico pa por aproba e parti medicinal. Den cierto paisnan esaki a wordo aproba caba mientras otronan ainda ta mirando esaki cu reserva.
Pasobra e miedo cu tin, segun sr. Salazar, ta cu e hendenan lo bay uza cannabis manera un ‘free for all’ sin medida y sin control. Esey ta un punto basta importante y tambe opinion publico. Lo mester bin evaluacion total di kico ta e opinion publico riba cannabis manera medicamento den cierto situacion. E parti tambe di regulacion y si lo bin leynan stricto pa determina e tipo di uzo preciso y con mester evalua e parti aki. Tambe tin e parti cientifico. Por pidi asistencia na NGO externo manera universidadnan cu ta haci estudio serio riba esaki y organisacion mundial di salud pa wak kico ta e opinion.”
Sin efecto adictivo
E medico ta conta nos cu si nos sa cu tin cierto componente di cannabis cu solamente ta afecta cierto parti di e curpa cu por wordo uza, pa kico no si e no lo crea adiccion of otro efecto toxico.
“E industria farmaceutico por saca specificamente cual ta e elemento particular sin otro adictivo cu tin. Tin e componente cu ta sirbi pa e parti di dolor por ehempel cu no tin problemanan adictivo. Por ta cu den e parti ey nan por bin cu un structura mas cientifico y miho. Si esaki ta sirbi of no, nos no por dicidi. Salud Publico semper ta hiba e parti cientifico.” E dokter ta sigui bisa cu si berdad e ta sirbi, bo tin un aplicacion special pa cierto tipo di pashent e ora cual lo wordo dicidi por medio di comunidad cientifico.
E dokter a bolbe subraya riba e parti regulatorio cual ta hopi importante unda cu ley mester bin den caso cu e keda aproba medicinalmente, pa e no crea un problema mas cu beneficio. “E lo bira un free for all unda tur hende lo tin e mata pasobra e ta medicinal. E mester bin cu regulacionnan na inicio y durante pa despues tin evaluacion di con e cosnan ta bayendo”, segun e dokter.
