betico croes

Ayera mainta net prome cu 11’or, a tuma luga ofrenda floral y discurso na e estatua di Betico Croes riba Plaza Status Aparte (cas di mayornan di Betico Croes). Presente por a mira lider di e partido MEP y varios politico, unda cu a canta Himno y scucha discurso di Sr. Glenbert Croes sigui pa esun di Sra. Evelyn Wever – Croes.

Durante di e discurso a Sr. Croes a enfatisa riba e importancia di celebracion di Dia di Betico, durante cua ta celebra e fecha natalicio di nos libertador Sr. Betico Croes kende si tabata na bida, e lo tabatin 78 aña.

Imagina cu nos awe, na bida cu pensioen unda cu a pesar cu ta bay cu pensioen e lucha no ta laga bo descansa. El a hiba un bida ehemplar sin descansa riba locual ta e lucha pa libertad. “Den apenas 14 aña a sa di prepara e pueblo pa e tarea grandi di biba den un Aruba liber. Y si mira cuanto hende a purba stroba esaki durante di e 14 aña nan aki, cuanto biaha nan a purba di strob’e den e lucha pa logra libertad pa nos pueblo. y si bo wak con den anochinan scur di revolucion na Aruba ora cu pueblo a sa di actua, nan a purba  mat’e na 1977 caba. Despues na 1983 ora polis a tira riba dje y no a logra mat’e. Y ora cu finalmente nan a dicidi den e accidente cu no tabata un accidente, 11 luna largo el a keda den un soño y pa despues bay laga nos.”

Segun Sr. Croes, hopi biaha mester haci reflexionnan asina aki y puntra dicon nan a purba mata Betico. e contesta ta pasobra nan kier a mata e deseo di e pueblo aki pa ta liber, y nan tabata sa cu si Betico wordo kita for di caminda, Aruba kisas hamas lo a bira un pais liber.” El a  sigui bisa cu 25 di januari unda cu ta celebra su fecha natal, nos ta celebra 30 aña di Status aparte tambe, 30 aña cu Aruba ta un pueblo liber y mester compronde cu e celebracion ta hopi importante. Tanten cu su memoria ta bibo e sentimento di nos pueblo pa ta liber y  lucha pa locual cu nos tin no por wordo kibra y ta importante pa hamas laga su memoria muri. E 30 aña nan aki di Status Aparte lo sigui lucha den su nomber y ehempel pa Aruba conserva e libertad cu el a entrega su bida pe. Ban celebra e dia aki ya cu e no por a celebra y biba e status aparte.

Sra. Wever – Croes a tuma e palabra despues di Sr. Croes y a enfatisa cu un persona no ta muri ora cu e bandona e mundo, sino ora cu lubid’e. Riba dia di Betico ta mustra cu no ta bay lubid’e y no ta bay permiti pa mishi cu su memoria ni logronan cual ta identidad di Aruba.

Despues di e discurso di Sra. Wever Croes personanan presenta na e plasa a keda celebra den ambiente Rubiano cu musica, cos dushi y cuminda tipico.