Departamento di Salud Publica ayera den oranan di merdia a duna di conoce cu na Centro Libertador Betico Croes na unda ta tumando luga e campaña nacional di vacunacion un incidente poco fastioso a sucede momento despues cu un ciudadano a bay tuma su vacuna.
Na e momento ey e persona aki despues a cuminsa sinti no mucho bon y a desmaya riba vloer, nan a señala cu e ekipo medico tabata presenta pa atende y duna e asistencia necesario mesora pa e ciudadano cu a indica cu e no a come prome cu lo a bay tuma e vacuna y tabata hopi nervio, cu segun nan a sigura esey ta comprendibel.
Despues cu ekipo medico a stabilisa e ciudadano y a wordo confirma cu e tabata sinti bon e persona a bandona e luga y a bay back su cas.
Pa cu esaki, Bon Dia Aruba a investiga si ta necesario cu pa un persona mester haya e vacuna e tin cu come prome, pero diferente estudio ta bisa cu e persona no mag di bay tuma e vacuna sin come y otronan ta indica cu esey no ta interveni den e proceso.
