Den e ultimo simannan nos por a experimenta un discusion amplio tocante un partido politico nobo, cu eventualmente lo ser lanta pa e ministro di Turismo, den un conflicto serio cu su coleganan. Na e momento aki no tin un resultado definitivo di e intento di reconciliacion den e partido, cu lo a tuma luga e fin di siman cu a pasa. Di tur manera, cu of sin reconciliacion, ban supone cu nos ta haya un partido politico nobo cu suficiente apoyo pa haci un diferencia den nos sistema politico. Anto na ki momento nos por bisa cu un partido nobo ta of lo haci un diferencia, cu realmente ta beneficia comunidad en general?
Pa cuminsa, un partido nobo lo mester cuminsa na trata di no ta un partido tradicional, manera nos conocenan den e ultimo trinta aña di status aparte, y tur e añanan prome cu esey tambe. Kico esey ta implica? Por ehemplo, organisa un base di apoyo riba otro criterio y beneficio y no esunnan aplica tradicionalmente. Esey lo implica no hiba campaña a base di promesa di cosnan material, un set di sala nobo, un frishider, stoof of otro articulo pa cas. No ofrece placa pa pone bandera na cas of den cura. No ofrece yiu of nieto trabao na gobierno, si acaso nan tin un diploma adecua of no. Y sigur no ofrece trabao como ‘coordinador’ mientras cu di baina e persona ta compronde e significante di e palabra mes. E ta implica tambe no pasa manera dande rond den comercio buscando placa pa cumpra T-shirt y bandera, y pa paga fiesta pa e simpatisantenan cu ta participa den tur sorto di evento cu e partido ta organisa den tur skina di nos isla.
Pasobra ban ta franco, organisa evento cu ta haci impresion riba publico, y mas cu tur cos ta haci hende kere cu e partido tin bon acogida den pueblo, awendia ta costa miyones. E votado comun y coriente no tin e tipo di placa ey pa por yuda financia e partido na e nivel aki. Pa mas ‘koffiemorgen’ cu bo lo tene, nunca lo yega na un nivel serio di financiamento. Esey ta conta pa tur e otro metodonan tradicional di recauda fondo di sponsornan comercial. Y logicamente lo ta di spera cu e sponsornan aki lo kier algo como recompensa, una bes cu e partido cu nan a apoya drenta gobernacion. E variedad di fabor cu esun den gobierno por ofrece ta grandi: permiso pa personal di exterior, permiso pa tereno y construccion, trabao den gobierno pa famia, contract pa entrega di material of construccion di obra pa gobierno, etc.
Esnan cu ta di acuerdo cu e sistema aki lo argumenta cu esaki ta e unico manera pa financia e sistema aki, y cu si bo no haci’e asina, otro ta bin haci’e y ta bay cu e votonan. Con tal cu no ta mira un posibilidad pa e sistema di gobernacion funciona di otro manera cu no ta a base di faboritismo cumpra, y bon paga! Awor, si nos ta pensa cu esey ta e unico manera cu nos sistema di gobernacion por funciona, y nos ta nenga di mira cu tin otro manera pa haci esaki, anto nos mester tin e curashi pa bisa gobierno di Reino pa nan hala leu y no bin maha na nos cabes regularmente tocante ‘bon gobernacion’ y exigi di nos gobiernonan cu nan no por trata nan ciudadanonan segun cu nan a corda di paga pa e fabornan cu nan ta ricibi. Pasobra finalmente e manera di pensa aki ta haci cu e ciudadano no tin derecho mas, o tin derecho solamente si el a paga di antemano na e loket informal, cu no ta den e oficina di e departamento mes, sino na otro adres unda tin un persona sinta cu ta cobra, pero cu naturalmente no tin naaada di haci cu ningun mandatario pero cu si ta logra haya e permiso o documento cu e bon cliente ta desea. E hasta por ta mas efectivo cu djis entrega bo documentonan na e loket oficial.
Si esaki ta e conclusion y esaki ta e manera cu nos kier sigui, laga nos tuma un decision y vota pa e tipo di gobernacion aki, y duna un señal bon cla na e ciudadano Hulandes cu ta desea di biba den un pais unda e tin derecho y no mester di fabor, pa e muda bay na otro parti di e Reino aki unda e ta kere cu si e por haya e derechonan ey. Si acaso tin partido nobo den proximo eleccion, puntra nan y e esunnan existente, unda nan ta para den e materia aki.
