Mocion pa retira un Minister y un Parlamentario cu no a vota pa su mesun mocion. Y tur piscado cu kier por drenta awa cu harpun y pisca. Esaki tabata esencia di un reunion di Parlamento cu mester a produci un concepto di ley pa cuminsa su trayectoria, y cu mientrastanto lo mester a presenta un maneho di tolerancia, un gedoogbeleid, pa piscamento cu harpun.

E mocion di desconfianza contra Marisol Lopez Tromp tabata entrega pa lider di Fraccion di MEP, Rocco Tjon kende a presenta esaki despues cu e Minister a hiba palabra durante e di dos tanda. Aki Minister Lopez Tromp a cuestiona si Parlamento ta tene cuenta cu reglanan di bon gobernacion y integridad si ta pusha pa un gedoogbeleid sin cu ta tene cuenta cu e proceduranan corecto. E Minister a cuestiona e actitud di mofa cu tabatin den direccion di e consehonan cu el a ricibi di e departamento y instancianan cu ta cay bou su maneho y cu a duna comentario riba un nota di Conseho di Minister unda a tuma e pasonan pa yega na tanto un ley (lb) y un gedoogbeleid. E nota tabata concipia pa Minister di Husticia Andin Bikker.

En principio, tur tres Minister a indica di kier cumpli cu piscadonan. Pero Minister Lopez Tromp a bisa cu e mester a pidi conseho di su departamento y instancianan riba e nota ya cu e mes no a lesa esaki te 9or di e anochi prome. A yega na un palabracion den Conseho di Minister, pero no a concipia un nota di maneho hunto. Ademas, durante e mesun reunion Minister Cris Romero a bisa cu e lo keda encarga pa registro di e piscadonan y cu Santa Rosa ya tin un formulario cu mester keda adapta y cu dialuna awor lo anuncia e proceso. Minister Romero sinembargo a bolbe bisa cu si yega na e ley mes, no ta sigur cu e lo haya un firma.

Minister Lopez Tromp di su banda bisa cu den principio, e no ta pro un maneho di tolerancia y cu ta pa e motibo ey mes a pasa oranan ta traha hunto cu su departamentonan pa yega na un consenso pa duna e grupo di piscadonan e oportunidad pa gana nan pan.

E tono di Marisol Lopez Tromp sinembargo no a cay den bon tera cerca fraccion di MEP cu a expresa den su mocion cu ta for di September caba a expresa cu kier mira pa Gobierno pa bin cu un maneho pa permiti piscadonan drenta lama cu harpun, y cu dia prome di October a presenta dos mocion sosteni unanimamente, unda a exigi pa e tres Ministernan en cuestion, cu ta Minister di Desaroyo Teritorial, Infrastructura y Medio Ambiente, Minister di Husticia y Siguridad, y Minister di Sector Primario y Transporte Crispin Romero a haya 10 dia pa presenta un maneho di tolerancia pa piscadonan cu ta haci uzo di harpun.

Pero, pa fraccion di MEP, Lopez Tromp no a mustra di kier sostene e maneho di tolerancia. Es mas, segun e mocion, e Minister a haci diferente expresion cu ta trece duda cu e lo sostene realisacion completo, implementacion y ehecucion di e gedoogbeleid. Ademas, Minister Lopez Tromp a haci diferente insinuacion y acusacion cu Parlamentarionan lo ta exigi pa e actua contra principionan di Bon Gobernacion cu no ta berdad, y cu miembronan di Parlamento di Aruba ta traha segun principionan di bon gobernacion manera ancra den Constitucion. Esaki a pone cu a bin un kiebro di confianza den e Minister di Desaroyo Teritorial, Infrastructura y Medio Ambiente. Como tal a dicidi pa retira confianza di Minister Lopez Tromp.

Fraccion di AVP mesora a bandona sala y edificio di Parlamento y Ricardo Croes di RED, kende tambe a presenta un mocion, esta cu pa mañan mes e piscadonan por drenta awa cu harpun sin problema, a declara di no ta dispuesto pa hunga wega politico y tambe a bandona sala y edificio di Parlamento. Croes no a ni vota pa su propio mocion.

A keda 10 miembro di Parlamento presente, incluyendo Presidente di Parlamento Ady Thijsen y e miembronan di fraccion di POR, y tur 10 a sostene e mocion di desconfianza. Tambe tur 10 a sostene e mocion di POR a bin cu un

Quorum of no

Pregunta grandi ta sinembargo ta si e votacion tabata legal of no. Door cu AVP y RED a bandona edificio, y sin presencia di Parlamentario Lejuez, no tabatin quorum. Pero asina mes Presidente di Parlamento Ady Thijsen a permiti e votacionnan tuma luga.

Segun Thijsen, e palabracion tabata cu mayoria cu keda den Parlamento por vota. Sinembargo, tanto AVP, como Parlamentario Lejuez a bisa cu locual a palabra ta cu berdad mester di quorum di un minimo di 11 pa habri un reunion, sinembargo, durante e periodo aki di Covid, Parlamentarionan no mester keda den sala. Nan por sinta den nan fraktie-kamer. Pero na momento cu Arthur Dowers a anuncia cu fraccion di AVP ta bandona sala y edificio, y Ricardo Croes a bisa cu e no ta hunga wega politico y cu e tambe ta bandona edificio, a keda 10 miembro so. Es mas, Croes a bisa Presidente di Parlamento, pa “corda conta cabes,” pa despues bandona edificio.

Segun Constitucion no tabatin quorum

E reglanan nobo debi na Covid a bin na vigor dia 24 di Maart 2020, unda a introduci reglanan di ‘social distancing,’ y a permiti solamente un cantidad limita di Parlamentarionan den sala. E otronan por a sigui e reunion den nan oficinanan, haciendo uzo di medionan audiovisual. Pero na momento di a anuncia cu ta bandona e edificio di Parlamento, pa AVP y pa RED, e tabata mustra nan intencion cu nan no ta presente mas na e reunion y como tal no tabatin quorum.

Bon Dia Aruba a compronde di varios hurista cu e paso cu Presidente di Parlamento mester a tuma na momento cu a pasa pa votacion, ta pa conta esunnan presente, y si no tabatin 11 miembro, e mester a pospone e votacion pa ora tin quorum.

Articulo 3, inciso 16 di Constitucion ta bisa cu Parlamento no por reuni ni tuma decision sin cu mas cu mita di e miembronan ta presente. Articulo 27 di Reglamento di Ordo di Parlamento ta bisa cu mayoria di Parlamento ta dicidi, pues mester ta 11. Cualkier palabracion ta suheto na hierarchia di ley. Y aki Constitucion ta mas halto cu Reglamento di Ordo y Reglamento di Ordo ta mas halto cu un palabracion.

Tin dos manera cu e saga aki ta yega na su fin. Minister Marisol Lopez Tromp por dicidi cu e votacion no ta valido, pues e ta sigui como Minister. Of e ta dicidi di entrega su retiro. For di fuentenan ayera nochi en todo caso a compronde cu e Minister ta considera cu e voto pa e mocionnan no tin validez pa motibo di falta di quorum