Un otro variante di Covid, origina na India ta presente na Aruba

Mediante un comunicado di Departamento di Salubridad Publico (DVG) comunidad a wordo informa cu na Aruba a registra un caso di e variante di India y ta p’esey cu a tuma decision pa cera frontera cu e pais aki.

Tambe a informa cu aunke ta un caso so cu a detecta te awor na Aruba, nan ta considera cu e paso aki ta necesario pa preveni mas caso di e variante aki, nan lo sigui monitorea e situacion di hopi di cerca.

Manera a keda conoci den hopi medionan di comunicacion, India ta un di e paisnan cu mas a wordo afecta cu Covid-19 reportando cerca di 200.000 caso di Covid-19 pa dia desde 15 di april ultimo loke ta indica cu awor ta e epicentro di e pandemia cu e 40% di e casonan nobo na nivel mundial, na e momentonan aki tin hopi mas caso desde e pik di 93.000 caso pa dia cu a registra desde aña pasa. E cantidad di fayecido tambe a aumenta drasticamente.

Segun Ravi Gupta, profesor di microbiologia di Universidad di Cambridge na Reino Uni, “e sobrepoblacion y densidad di India ta haci di dje un foco perfecto pa cu e virus aki ta registra varios mutacion”.

Sinembargo, e ola di casonan lo por a wordo causa pa aglomeracionnan grandi y pa falta di medidanan preventivo como uso di tapaboca y distanciamento social.

E variante di India, denomina B.1.617 a keda conoci desde final di aña pasa, casi na mesun momento cu e variante di Reino Uni, cu ta mas dominante na paisnan Europeo y tambe na India, e ta esun mas contagioso y hasta un 58% mas mortal compara cu e variante Hindu cu te awor su efectonan a keda conoci loke ta nifica cu probablemente ta menos transmisible

Datonan di Gobierno di India ta mustra cu e variante aki ta dominante na Estado di Maharashtra, centro di e pais, e prevalencia di e version aki ta creciendo di forma basta lihe den ultimo lunanan, husto despues cu a cuminsa e segundo ola na e pais na unda ta causando e morto di mas di 2.600 persona pa dia.

Variante di India a yega na 19 pais, casi tur di nan ta casonan aisla, den su mayoria pasaheronan di vuelonan cu a yega for di e pais Asiatico, Organisacion Mundial di Salud (WHO) a adverti cu e variante aki ta califica como “variante di interes” y no como “variante preocupante” compara cu e otro variantenan como esun di Reino Uni, Brasil, Sur Africa y California.

India a controla e prome ola di e virus di un manera basta bon y pa via di esaki e medidanan a wordo flexibilisa y nan a permiti actividadnan religioso y concentracion di forma deportivo mientras e variante Britanico tabata plamando di un manera mas infeccioso y mortal.

Loke a hala mas atencion di e pandemia na India, ta e manera con e fayecidonan di e virus ta wordo kima como un dramatico escenario y a provoca cu henter mundo ta mira India cu preocupacion pa via di e collapse di hospitalnan y e cantidad di mortonan pa dia, aunke e cremacion ta considera como un ritual normal den e cultura di e pais aki.

Tambe, e fundador y director di laboratorio BioNTech, Ugur Sahin a splica diaranson di siman pasa cu e ta confia den e eficacia di su vacuna, cu a wordo desaroya conhuntamente cu e laboratorio Mericano Pfizer, pa loke ta trata e variante Hindu.

Aunke e pruebanan “ainda ta continua”, e variante aki ta presenta varios mutacion cu a wordo estudia caba y pa lo cual e vacuna ta actua.

Di otro banda, mediante un ultimo actualisacion di cifranan tocante personanan contagia cu Covid-19 por a mira un reduccion di casonan positivo y cu ta resulta beneficioso pa comunidad, sin lubida ainda e medidanan di prevencion.

Asina a expresa Departamento di Salubridad Publico den un comunicado recien na unda cu considerando e ultimo desaroyonan pa loke ta e pandemia, Crisis Team ta introduci algun cambio den e maneho entrante awe dialuna 3 di mei.

Nan a informa cu cautelosamente ta flexibilisa algun medida, cuidando e progreso cu a logra te awo. Pa loke ta sector di entretenimento, en bes di 1 musico awor por tin maximo 3 musico of cantante riba escenario den cada luga, bailamento di publico no ta permiti.

Pa loke ta trata entiero, a tuma e decision pa aumenta e cantidad di personanan cu por ta presente den un sala di entiero: di 10 pa 50 persona.

Crisis Team ta motiva tur esunnan cu ainda no a vacuna pa haci esaki, mas hende sigui vacuna, mas e casonan lo sigui baha y mas medida por flexibilisa y den futuro hasta elimina.