Ayera tambe a keda conoci den comunidad cu otro miembro di partido Accion21 a retira, Cristian Soto Garcia a publica un carta riba e red social Facebook na unda el a afirma cu na momento cu tin division pisa den partido el a cuminsa distancia su mes.
Soto a afirma cu for di 1 di juli su persona a anuncia den e chatgroup di e partido mes cu el a distancia di esaki pa via di diferente incidentenan, “division pisa den partido, hopi wega di redo, midimento di poder y buscamento di beneficio personal” na unda el a pidi un reunion cu e lider di e partido Miguel Mansur y asina mira kico lo tabata su siguiente paso.
Den e reunion cu a tuma luga dia 2 di juli ultimo, Soto a menciona cu el a bay den un posicion ‘non actief’ sperando desaroyonan interno y pa wak con esey lo a wordo maneha, “lastimamente mi mester bisa cu despues di declaracionnan haci door di sr, Mansur den prensa, el a bira cla pa mi cu un liderasgo di division, di kier demostra poder externo y di ego, no ta algo cu mi por forma parti di dje” Soto a enfatisa den su carta. Bon dia Aruba a tuma contacto cu Soto pero e la menciona cu e no tin nada mas pa bisa y e carta ta na su luga.
Asina mes, el a sigura cu “esaki no ta nifica final den politica pa mi, sea paden of pafo di e arena, mi lealtad ta keda cu Pais Aruba y lo sigui vocifera mi mes na tur momento” pa finalisa el a gradici na esnan cu a deposita nan confiansa den dje den ultimo eleccion.
