Mas keho y mal contento ta sigui yega na nos mesa di redaccion pa loke ta trata diferente situacion cu tumando luga na Hospital Dr. Horacio Oduber (HOH) cu for di algun siman caba Bon Dia Aruba ta treciendo dilanti di manera anonimo, manera e mesun fuentenan ta sigura di kier keda pa temor di represalia contra nan.

E biaha aki ta e caso di un ex-trahado cu a dicidi di bay y laga su trabou atras debi “cu cos no ta bon na H.O.H”, segun e fuente a bisa den su carta y ta trece diferente punto dilanti cu ta lo siguiente:

  • Tin hopi vriendjespolitiek ta pasando. Si no ta banda di nan, referiendo specificamente na esnan den puesto halto, por lubida: nan ta laga bo atras. Bo no por crece den bo trabou.
  • Hopi bullying: ta keda intimida te ora bo fada y dicidi di no traha mas.
  • Sexual harassment: scucha comentarionan cu no ta na su luga, comentarionan inapropia. Comentarionan cu ta pone sinti e persona incomodo.
  • Ta pidi pa inspectie papia cu diferente nurse cu a kita for di trabou y scucha nan kehonan/ nan dolornan.
  • Na H.O.H e yiu di tera (Arubiano) ta derderangsburger . E Hulandes ta na prome cu luga y e Filipino ta na di dos luga.
  • E tristo ta tambe cu tin algun yiu di tera (Arubiano) ta conspira sam sam cu nan coleganan Hulandes pa tene nan mesun hendenan abou.

Igualmente, e ta señala cu tur piso na H.O.H e nursenan Arubiano ta pasando den duro, vooral piso tres cu tin un hoofd Hulandes di inicial R.K. cu ta keda weg tur e nursenan Arubiano , nan tin cu wanta hopi bullying di e hoofd, El a laga sa cu ta cu Filipino y cu Hulandes (macamba) e ta deal, e ta keda pest e nurse Arubiano y door di esey hopi a kita. Por conta riba dede cuanto nurse Arubiano a keda.

Ta sigura cu tin un cluster manager Hulandes di inicial E.V. cu tur cos cu ta pasa riba piso/afdeling e ta sconde pa e director di H.O.H y manera el a menciona, hopi hende tin miedo di dje, e ta un homber cu ta dicta na hospital. “Si e no ta gusta bo, bo wel di lubida: bo chens cerca dje pa sigui bay dilanti, sigui crece ta hopi pero hopi minimal. Dus casi nihil.”

Den e documento aki, tambe ta trece dilanti cu enfermeranan no tin ningun problema cu e director di hospital, cu meneer J.V. nan ta sinti cu e ta haciendo un bon trabou, e personanan cu ta bully/pest ta mayoria biaha ta e zorgmanagersnan. “E trahadonan ta cansa , nan no por mas, mester haci algo cu e situacion aki. Hopi di e nursenan Hulandes no ta trata e pashentnan tampoco manera mester ta. Esey debi hopi biaha cu tin un “taalbarrière” pero tin biaha empatia tambe ta hunga un rol. Hopi biaha despues di tempo nan ta bay bek na nan pais.”

Den e texto sin nomber, den cual Bon Dia Aruba a hay’e den e post tambe mescos cu e kehonan anterior di H.O.H e persona aki ta pidi na su ex-coleganan lo siguiente: “Pa ultimo mi kier a bisa mi ex-coleganan pa bo salud mental: busca un trabou unda bo por traha den un clima saludabel y agradabel pasobra na H.O.H. e clima ey ta leu di busca. Tambe bisa e director haci algo por fabor. Hopi no kier bay pero e director tin cu actua si pa drecha e clima na hospital. Basta di cultura di miedo. Bin dilanti y conta bo experencianan y con bo a ser trata. Basta di cultura di Piet Hein pa parti di diferente hoofd Hulandes. Bin cu un protocol cu riba cada afdeling mester tin 70% di yiu di tera y 30% di otro nacionalidad. Haci un survey entre ex-pashentnan con nan a experencia nan estadia na hospital. Si gobierno cu ta paga hospital via AZV por haci un sorto di doorlichting pa asina por saca afo con por crea un hospital mas saludabel, no pa e nursenan Arubiano so pero pa nos comunidad di Aruba tambe.”

Otro casonan
 Bon Dia Aruba tin algun siman caba publicando diferente keho y mal contento di situacionnan cu ta tumando luga na hospital, entre nan, testimonio y publicacionnan di specialista Dr. Posner ken a duna un bista sin filter di e situacion precario dentro di H.O.H. No solamente dokternan ta confronta cu intimidacion personal y profesional di e Hunta Directiva, sino cu varios empleado cualifica ta haya nan mes obliga pa retira di un manera brutal.

Otronan a bandona e organisacion boluntariamente pa motibo di e comportamento inapropia aki. Ademas, tras di cortina, ta entregando varios demanda pa victimisa empleadonan, un tactica usa pa e Hunta Directiva pa forsa retiro inhusto di empleadonan critico cu ta mustra nan fayonan y maneho fracasa.

E conductanan alarmante aki a conduci na un deterioro preocupante den e cuido disponibel na hospital riba e isla. Un escasez di personal cualifica y motiva, instabilidad interno dentro di HOH, desgaste significativo di empleadonan hunto cu problemanan andando cu proyectonan di construccion y e costo halto di consultant externo, tur ta contribui na empeora e situacion. E politica fracasa y maneho deficiente aki ta laga cla cu tin fayonan fundamental den varios aña, cu ta costa tanto e pashentnan como e poblacion di Aruba.

Transparencia y responsabilidad
Minister di Salubridad Publico, Dangui Oduber ta enfatisa den e publicacion di Bon Dia Aruba riba dia 28 di augustus cu tur keho tocante e Hunta Directiva mester ser entrega door di e Hunta di Supervision. Sinembargo, e minister di Salud ta carga responsabilidad final pa sigura maneho efectivo den hospital y pa sigura suficiente disponibilidad medico pa poblacion di Aruba. Den otro palabra, e confiansa cu e minister t pone den e Hunta di Supervision pa cu e situacion aki ta parce di indica un falta di comprension di e situacion.

Investigacion independiente
 Un investigacion completo y independiente mester tuma luga riba e mal practica y mal conducta dentro di H.O.H pa asina por haya sa e magnitud exacto di e problema y formula accionnan concreto.

Mehora condicion di trabao
 Mirando e kehonan andando cu a bin dilanti den medionan di comunicacion recientemente, tambe mester duna prioridad na crea un ambiente di trabao cu ta safe y ta duna sosten na empleadonan pa asina continua dunando cuido di calidad halto pa pashentnan di H.O.H.

Yamada urgente pa cambio
 No por ignora e revelacionnan aki. Tanto e salud di poblacion di Aruba y e integridad di cuido di salud, como tambe e siguridad di empleadonan, ta den riesgo. Ta keda na e partidonan involucra y pa gobierno pa tuma accion inmediato y lucha pa un sistema di cuido di salud cu ta sostene e standard mas halto di cuido y etica, unda conflicto di interes, victimisacion di ciudadanonan y faboritismo no mester hunga un rol.