Ayera mainta Mary Joan Foundation a organisa un conferencia di prensa pa duna di conoce “Net lo cual bo mester di dje” un organisacion cu lo yuda e fundacion aki pa recauda fondonan di un manera distinto pa via di e pandemia Covid-19.

Mauricio David Villa miembro di e organisacion aki a splica cu esaki a bin dilanti pa yuda otro fundacionnan na Aruba sabiendo lo cual ta pasando cu e crisis di Covid-19, ademas el a bisa cu nan kier yuda e comunidad y yuda Mary Joan Foundation.

Asina mes, el a declara cu nan a bin na remarke pa yuda e fundacion pa motibo cu nan sa cu cada un di e famianan por tin un persona cu por mester di esaki, manera ta conoci, Mary Joan Foundation ta un fundacion cu tin añanan yudando pashentnan cu cancer y asina mes nan kier sigui yuda e fundacion aki pa por sigui cu esaki.

Jose Tromp miembro di directiva di Mary Joan Foundation a comenta cu e ta hopi gradici cu e organisacion Net lo cual bo mester di dje y cu esaki ta algo cu sigur e fundacion lo bay haci un bon uso di dje, manera a menciona caba pa motibo di e crisis actual nan fondonan a baha drasticamente y nan lo no haci e colecta anual cu e fundacion ta haci tur aña.

Pa e motibo aki nan ta pidi pa cada persona cu por coopera cu esaki pa cumpra un ticket y asina por coopera cu Mary Joan Foundation.

Pa loke ta trata e manera con nan lo bay recauda fondonan pa e fundacion, nan a señala cu nan lo bay haci un rifa cu tin un balor di 10 florin y en bes di e persona lo gana placa lo gana otro premionan diferente como pago di huur pa cada luna durante e periodo di un aña, cuminda pa luna na balor di 300 florin pa henter un aña, awa na balor di 250 florin y electricidad na un balor entre 250 pa 300 florin pa luna, tambe pa henter aña.

Mary Joan Foundation hunto cu organisacion Net lo cual bo mester di dje a sinta hunto pa por papia tocante e actividad aki cu lo tuma luga manera un drive thru na unda e personanan lo por pasa cu nan auto dia 23 di october dilanti di Wema na Ponton, e auto mester ta full dorna di color ros di un manera creativo y di e manera aki por cumpra e ticket, “full e organisacion lo ta para eynan cumpliendo cu normanan di distanciamento”, nan a sigura.

Ta importante destaca cu october ta luna di conscientisacion pa loke ta trata cancer di pecho cu ta un di e prome causa di morto na nivel mundial y ta representa e 16% di tur e cancer femenino, e fundacion aki a wordo crea na aña 2007 den memoria di Mary Joan Geerman.

Segun Organisacion Mundial di Salud, pa cada aña ta produci 1.38 miyon di caso nobo y 458.000 morto pa via di cancer di pecho, na paisnan cu ingreso hopi abou y medio, pero e mayoria di fayecido pa e causa aki ta registra na paisnan mas desaroya.

Pa loke ta trata factornan di riesgo di cancer di pecho, antecedentenan familiar ta esun cu ta multiplica e riesgo pa 2 of tres biaha, tambe tin factornan di reproduccion asocia pa un exposicion prolonga di estrogeno, ademas di cuminsa e pubertad den un edad hopi trempan of haya un yiu den un edad madura, tur esaki por presenta un factor di riesgo.