Senador opositor, Jeanine Añez, ta presidente interino di Bolivia desde diamars pasa, dos dia despues di e renuncia di Evo Morales, kende a denuncia for di exilio cu esaki ta un ‘autoproclamacion’ golpista.
Jeanine Añez ta yega na poder di forma provisional na un pais cu hopi movemento, cu militarnan riba caya, ocho fayecido y cerca di 500 persona herida desde eleccionnan fayido dia 20 di october ultimo, den un di e pio crisis den historia di Bolivia.
Añez a yega na La Paz desde e region Amazonico di Beni, como e unico salida for di e bashi di poder cu a keda pa e renuncia di Morales diadomingo pasa, cu a pone e pais den un caos te na e punto cu Ehercito mester subi caya pa apoya polis.
Ni sikiera tabata cla cu Parlamento Boliviano lo por reuni, teniendo na cuenta cu mayoria di nan ta pertenece pa e partido Movimiento al Socialismo di Evo Morales.
Pero e abogado aki di 52 aña a activa e mecanismo di sucesion cu a kibra e oficialismo, pa motibo cu ora Morales a renuncia, tambe a renuncia tur esunnan cu por tuma e funcion di presidente interino.
Di ta e di dos Vice Presidente di Senado, el a pasa pa presidi e Camara y asina a accede pa via di sucesion.
E constitucion cu Evo Morales a publica na 2009 ta establece cu e presidente di Senado ta na di dos luga den e liña di sucesion, despues di e vice-presidente di e pais.
E parlamentario, kende ta den politica desde aña 2010, ta pertenece pa e partido Union Democrata, un partido cu 9 senador so di 36, pero den poco minuut a presenta den Asamblea, cu ta uni Senado y Congreso, y sin capacidad di reaccion, el a asumi e funcion di forma interino hunto cu e hefatura di Estado.
