Un muhe di Chile di 48 aña a muri na Cali – Colombia, despues di varios operacion. El a muri supuestamente pa un paro respiratorio.
E muhe a ser identifica como Lorena Victoria Reyes Doñas, cu a yega te Cali diadomingo cu a pasa y el a ser someti na varios operacion miho conoci como “combo”. E conhunto di operacion aki ta inclui lipoescultura, trasero lanta, y liposuccion.
Fiscalia di Cali y funcionario di e Cuerpo Tecnico di investigacion a participa den traslado di curpa di e muhe Chileno, y den investigacion di e caso aki na clinica Picasso.
E hospital Clinica Picasso tabatin tur permiso na ordo, sin embargo medio di comunicacion y docter specialisa a adverti tocante e riesgo cu operacion miho conoci como combo por trece , pasobra e total di operacion aki ta hopi largo y ta tuma hopi tempo, den cual por presenta varios complicacion, manera un acumulacion di sanger o un paro respiratorio.
Famia di e muhe Chileno a declara cu e tabatin un salud basta bon y cu nan no tabatin informacion di e conhunto di operacion cu e lo a haya na Colombia, pasobra el a bisa cu e lo tabata bay pa un vakantie. Famia lo yega awe na Colombia pa asina retira e curpa di e clinica na Cali.
Siete persona a muri na aña 2017, despues di operacion estetico na Cali – Colombia, medionan local a informa.
