‘Un mucha inocente no ta merece di ta un martir’

Diadomingo un grupo di persona a reuni na Macro Supermarket pa un caminata silencioso pa asina recauda fondo pa cubri gasto pa entiero di e mucha di 5 aña R. Anastacia cu a fayece. Alabes muchanan tabata para central den e caminata pa nan mes tambe haya conscientisacion riba kico nan derechonan ta.

 E caminata cu a sali di Macro Supermarket direccion di Joe Laveist tabata uno cu a bay silenciosamente. Por a mira personanan para na canta di caminda cu tabata para cla pa haci nan donacion. E donacionnan aki ta pa por paga pa e deramento di e mucha cu a fayece. Shohaira da Silva, kende a organisa e caminata aki, cu hopi emocion a conta publico presente cu e caso aki ta extremamente lamentabel. Sinembargo sra. da Silva a expresa na e matutino aki su gratitud pa e respet cu a tene pa e parti silencioso di e caminata.

“Nos tabata contento cu diferente fundacionnan y organisacionnan a presenta pa e caminata aki. Te hasta minister di asuntonan social Glenbert Croes a presenta y nos ta aprecia cu e tambe a respeta e parti silencioso di e caminata. No tur ora bo mester ta den e voorgrond. Specialmente Aruba Dolphins a  aporta masha hopi pa medio di aporta cu cartanan traha pa nan muchanan pa despedi di e hoben cu a fayece.”

Pues e meta di e caminata aki tabata pa muchanan mes ta mas consciente di nan derechonan como mucha y pa laga e famia di e fayecido cu menos gasto cu ta posibel despues di ‘un perdida asina grandi’.

‘Un mucha inocente no ta merece di ta un martir’
Ora cu e caminata a yega na su final dilanti YMCA, e ciudadano Atan Lee a pidi un momento di silencio pa resa pa e mucha cu a perde su bida y mester a sufri di tal manera pa yega te ey. “Nos mester para keto pa realisa cu rond mundo cada 5 minuut muchanan ta wordo abusa. E criatura di 5 aña cu a perde su bida no ta merece di ta un martir. Nos tin cu tuma accion contra e situacion cu a yega asina leu den nos comunidad.”

Un ciudadano en particular a expresa cu hopi emocion con e mes no tin yiu pero ‘mi tin sobrino y sobrina’. “Nos tin cu lanta como mayor y duna sosten na nos muchanan”, e señora a expresa sin por a wanta su lagrimanan.