Unicef ta calcula cu 1,1 miyon di mucha mester proteccion y acceso pa servicionan basico na 2019 na Latino America y Caribe, pa via di e crisis migratorio na Venezuela. Tanto esunnan cu ta pafo di su pais, como esunnan cu ta bolbe bek, y tambe esunnan cu ta na comunidad di acogida y transito.
Di acuerdo cu datonan di e Fondo di Nacionnan Uni pa Infancia, den actualidad, alrededor di 500.000 mucha mester di asistencia, pa loke nan ta haci un yamado pa gobiernonan di e region defende e derechonan di e muchanan aki, incluyendo migrante y refugiado.
Segun su calculo, 4,9 miyon di persona den tur e region (incluyendo Brasil, Colombia, Ecuador, Guyana, Panama, Peru y Trinidad & Tobago) lo rekeri ayudo special e aña aki pa via di e condicion politico y economico na Venezuela, cu ta provoca un ola di migracion.
Esaki ta provoca cu e paisnan di transito y acogida ta sufri un sobrecarga, cu ta dificulta e prestacion di servicio esencial manera proteccion, atencion sanitario y educacion.
Di acuerdo cu e organismo pa infancia, e mucha cu ta pafo di su pais y su famia ta enfrenta dificultadnan ora di regula su status migratorio, algo cu por afecta e acceso pa su proteccion social, atencion sanitario, desaroyo infantil trempan, educacion, etc.
Unicef ta trahando cu e gobiernonan di e paisnan di transito pa sigura su inclusion den standard internacional, na e oficial proceso di migracion: protege e muchanan, no devolucion, no separa nan di nan famia y reunificacion, no detene e mucha y su famia, etc.
