Tur siman nos lo publica e resultadonan di e poll riba un ponencia.
Den nos corant Bon Dia Aruba lo publica un tabel unda por haya den un bista, kico e 9 partido a contesta riba e ponencia. Tambe por haya un splicacion di e ponencia/topico.
Splicacion di e ponencia E anuncio di gobierno cu e ministro encarga cu entre otro Labor a dicidi di ‘hala un banda’ y cu Conseho di Ministro ta bay di acuerdo pa nombra un ministro cu ta keda encarga cu su tareanan ‘tot nader order’ a lanta basta discusion. Y no menos awor cu a formalisa esaki den un decreto (Landsbesluit) cu tambe ta obheto di critica. Kico nos constitucion ta bisa?
Esaki ta duna un formulacion cortico di e relacion cu parlamento. Articulo II.1 inciso 3: “E ministronan ta responsabel na Staten.” Nada mas. Pero e frase cortico aki tin un splicacion un poco mas amplio den e Memorie van Toelichting di constitucion: “Den e tercer incision ta pone e base pa e responsabilidad politico di e ministronan. Cada ministro ta responsabel individualmente pa su actonan – por ehemplo demostra pa e ‘contrasigne’ (refrendo, contrafirma; red) di decreto – como tambe pa su eventual negligencia. E principio basico no ta kita cu e gabinete por haci e responsabilidad di un ministro e responsabilidad colectivo di tur ministro.
Por menasa cu retiro di henter e gabinete, si un di su miembronan ta confronta cu un mocion di desconfiansa. Un gabinete por dicidi por ehemplo pa carga responsabilidad colectivo, si ta trata di un caso di maneho general gubernamental.” Un pregunta clave pa contesta aki ta si ta trata di un asunto cu e gabinete por declara un asunto general cu nan ta haci un asunto di peso colectivo. Esey tabata un pregunta, te cu e decreto (Landsbesluit) di 12 di mei 2017 a sali, cu ta indica cu no tabata un decision necesariamente di e gabinete, sino di e prome ministro. E concretisacion di e medida di ‘releva e ministro en cuestion di su tarea y facultadnan como ministro’den e landsbesluit di 12 di mei 2017 no ta papia di un decision colectivo, pero di e ‘voordracht’ di e ministro encarga cu asunto general, prome ministro, pa releva e ministro, na Rey (gobernador). E decreto ta referi na dos articulo: II-5 di Constitucion y articulo 10, inciso 1 di Landsverordening Instelling Ministeries di 2014. E frase den articulo II-5 di Constitucion ta bisa: “Bij Landsverordening worden ministeries ingesteld. Zij staan onder leiding van een minister.”
Articulo 10, inciso 1 di e Landsverordening Instelling Ministeries ta bisa: “Een minister heeft de leiding van en is verantwoordelijk voor een ministerie.” E referencianan haci den e decreto no ta yuda clarifica e base legal di e decreto. Loke ta keda obheto di discusion si por cambia un ley (Landsverordening) via un decreto, si constitucion ta indica cu no por. Tin un caminda ainda, y esey ta e tradicion den Reino, cu e ministro ta tuma su retiro, y ta bolbe na su puesto despues cu e investigacion conclui cu no tin base pa un proceso legal contra su persona. Mientras tanto e ta cobra ‘overbruggingsstoelage’ te ora e caso keda cla y a base di decision di Staten e ta bolbe na su puesto.
